Italianët dhe grekët zgjedhin të investojnë në Shqipëri. Ndërmarrjet e mëdha të huaja janë të përqëndruara kryesisht në aktivitetet ekonomike si call center, prodhimi i këpucëve dhe aktiviteti bankar.
Ndërmarrjet e huaja e të përbashkëta me pronarë nga Greqia dhe Italia përfaqësojnë 52,8 % të ndërmarrje gjithsej.
Instituti i Statistikave të Shqipërisë, në bashkëpunim me Bankën e Shqipërisë, hartoi një publikim të veçantë për treguesit kryesorë të ndërmarrjeve me pronësi të huaj dhe të përbashkëta që operojnë në Shqipëri.
Duke iu referuar periudhës nga viti 2016-2018, statistikat në lidhje me ndërmarrjet private të huaja dhe të përbashkëta (shqiptare dhe të huaja) synojnë të monitorojnë situatën, strukturën, intensitetin e tregtisë dhe performancën e tyre brenda territorit të Shqipërisë.
Në vitin 2018, ndërmarrjet e huaja e të përbashkëta që operojnë në territorin e Republikës së Shqipërisë janë 6.259, ndërsa në fund të vitit 2017 ishin 6.295 ndërmarrje.
Në vitin 2018 ndërmarrjet me origjinën nga shtetet e Bashkimit Evropian zënë 2,5 % të ndërrmarjeve aktive gjithsej në Shqipëri, dhe 64,8 % të ndërmarrjeve të huaja dhe të përbashkëta.
Ndërmarrjet me origjinë nga shtetet e Ballkanit Perëndimor përfaqësojnë 10,3 % dhe ndërmarrjet me origjinë nga shtetet e tjera zënë 24,9 % të ndërmarrjeve të huaja e të përbashkëta.
Ndërmarrjet me pronësi 100 % të huaj përfaqësojnë 65,6 % të totalit të ndërmarrjeve të huaja e të përbashkëta, ndërsa ndërmarrjet e përbashkëta me mbizotërim të huajt përfaqësojnë 13,7 % të totalit.
Sipas të dhënave të publikuara nga INSTAT, në ekonominë shqiptare, ndërmarrjet nga Shtetet EU janë mbizotëruese ne shërbime të tjera (25,1 %), tregti (15,8 %) dhe industri (10,9 %) ndaj totalit te ndërmarrjeve te huaja dhe te përbashkëta.
Në vitin 2018, ndërmarrjet e vogla nga vendet e BE-së mbulonin 77,8 % të të gjitha ndërmarrjeve të BE-së, ndërsa kompanitë e mëdha mbulonin 1,1 %. Kjo përqindje e bizneseve të vogla dhe të mëdha lidhet me veprimtarinë ekonomike ku ata veprojnë.
Përqindja më e lartë e shitjeve neto të realizuara nga ndërmarrjet e huaja dhe të përbashkëta, krahasuar me ndërmarrjet shqiptare është në sektorin e Shërbimeve të tjera me 46,2 %, ku ndikimi më i madh është nga grupi i shteteve të BE-së (39,7 %).
Përqindja më e ulët e shitjeve neto për ndërmarrjet e huaja dhe të përbashkëta është në sektorin e Tregtisë me 13,9 %.
Shtetet e tjera kanë ndikimin më të madh të shitjeve neto në sektorin e Industrisë nxjerrëse me 39,9 % dhe vendet e Ballkanit perëndimore kanë ndikimin më të madh të shitjeve neto në sektorin e Tregtisë me 3,1 %.