Trajneri i skuadrës spanjolle të Malagas, Victor Sanchez del Amo është shkarkuar nga detyra pasi në internet është duke qarkulluar një video e tij me përmbajtje seksuale.
Ky lajm është bërë publik nga klubi i Kategorisë së Dytë në kampionatin spanjoll, i cili në një komunikatë për mediet ka bërë të ditur se vendimi do të qëndrojë deri në përfundim të hetimit “efekti është i menjëhershëm deri në përfundim të një hetimi të plotë”-thuhet në reagimin e Malagas.
Vetë Victor Sanchez kishte reaguar më parë në lidhje me këtë video duke u përpjekur të mbrojë veten e duke thënë se është viktimë e një krimi kundër intimitetit të tij
“Ju informoj se jam viktimë e një krimi kundër intimitetit tim. Çështja është në dorë të policisë dhe unë do të bëj gjithçka që të ndjek udhëzimet e saj”,-thuhet në postimin e trajnerit.
Rikujtojmë se për këtë skuadër luajnë dy lojtarë me origjinë shqiptare Armando Sadiku dhe Keidi Bare.
Ndërsa, bërja publike e videos dhe vendimi i Malagas ka përçarë opinionin publik në Spanjë. Shumë prej kolegëve të Sanchez i kanë dalë në krah, ndërsa disa medie të shumta kanë sulmuar teknikun./Fjala.al/
