Prokuroria e Përgjithshme po kryen një verifikim të thelluar për kryebashkiakun e Librazhdit, Kastriot Gurra nëse preket ose jo nga ligji i Dekriminalizimit.
Sektori i Dekriminalizimit i ka kërkuar të premten KQZ-së formularin e kryebashkiakut të Librazhdit, formular të cilin Komisioni Qendror i Zgjedhjeve ja ka dërguar Prokurorisë po brenda ditës së premte.
Formulari i dorëzuar nga Kastriot Gurra nuk ka asnjë dënim, ndalim apo hetim të deklaruar, si dhe asnjë ndryshim në gjeneralitete.
Ende nuk dihen dyshimet apo indiciet që ka nxitur prokurorinë të hetojë kryebashkiakun e Librazhdit, Gurra i cili po ushtron mandatin e dytë në krye të bashkisë.
Deri më tani prokuroria ka nisur procedurat për hetimin e 5 të zgjedhurve kryetar bashkie nga votimet e 30 qershorit.
Valdrin Pjetri në Shkodër la mandatin, në Vorë Agim Kajmaku është në kërkim, mbi Qerim Ismailajn vazhdon procesi i hetimit, në Vaun e Dejës, ku u votua Mark Babani ende nuk ka një përfundim mbi hetimet. Ndërsa së fundi ka nisur dhe procesi mbi Lefter Allën në Bulqizë.
