Mbërrin nesër në Tiranë presidenti i Parlamentit Europian, David Sassoli.
Sassoli do takohet me Ruçin në orën 14:45 në Kuvend. Ai nesër do të marrë pjesë në seancën plenare.
“Nesër, ditën e hënë, më datë 3 shkurt, në orën 14:45, në sallën e seancave plenare, Kryetari i Kuvendit, z. Gramoz Ruçi, do të presë Presidentin e Parlamentit Europian, z. David Maria Sassoli. Pas takimit, në orën 15:15, Presidenti Sassoli do të përshëndesë në seancën plenare të Kuvendit të Shqipërisë”, thuhet në njoftimin për media nga Parlamenti.
Gjatë vizitës së tij në Tiranë, Presidenti i PE-së do të takohet me Presidentin e Republikës Ilir Meta, kryeministrin Edi Rama, kryetarin e Bashkisë së Tiranës Erion Veliaj, me kryetarin e PD-së Lulzim Basha dhe drejtuesit e grupeve politike. Sassoli, gjithashtu, do të mblidhet dhe do të diskutojë me studentë të universitetit, si dhe me përfaqësues të grupeve të ekspertëve dhe UNICEF-it.
“Po shkoj në Shqipëri për të inkurajuar dhe për të dhënë shpresë për të ardhmen pas disa muajve të vështirë për vendin”, ka shkruar ai.