Kreu i Lëvizjes Vetëvendosje, Albin Kurti, dhe ai i Lidhjes Demokratike të Kosovës, Isa Mustafa, në një konferencë të përbashkët për media në hollin e Kuvendit të Kosovës, kanë zyrtarizuar arritjen e koalicionit qeverisës.
Albin Kurti ka deklaruar konkretisht se qeveria e drejtuar nga ai do të ketë 15 ministri.
“U dakordësuam për të zgjedhur qeverinë e re. Ne e kemi nënshkruar marrëveshjen dhe jemi marrë vesh për të gjitha. Kryetari Mustafa do mbajë mbledhje të Këshillit të Përgjithshëm. Unë si kryetar i Vetëvendosje mësova se po organizohet referendumi. Ishte një proces jo i lehtë.”, tha Kurti.
Po ashtu Kurti tha se me LDK-në janë dakordësuar që kjo qeveri të ketë 15 ministri dhe 33 zëvendësministra.
Kryetari i VV-së theksoi se partia e do të propozoj kryeparlamentarin që do të zgjidhet nga radhët e LDK-së.
Arritja e marrëveshjes u konfirmuar dhe nga Isa Mustafa, i cili theksoi se ky hap do të jetë në të mirë të Kosovës.
“Ne kemi arritur marrëveshje. E vlerësojmë e është marrëveshje në dobi të Kosovës. Marrëveshja është rezultat i mirëkuptimi dhe një pune mjaft të gjatë. Kemi hulumtuar të gjitha alternativat dhe kemi ardhur në një zgjidhje që mendojmë se është në interes të Kosovës”, theksoi Mustafa.
Ndërkaq, Albin Kurti do të kërkojë votat e deputetëve për tu bërë kryeministër në seancën plenare për votimin e Qeverisë së re, të hënën më 3 shkurt. /Fjala.al
