Ish-ministri i jashtëm Ditmir Bushati ka kritikuar në Kuvend, projektligjin për marrëveshjen e qendrave kulturore mes Shqipërisë dhe Maqedonisë së Veriut.
Marrëveshja parashikon hapjen e qendrës kulturore në ambasadën shqiptare në Shkup për promovimin e kulturës tonë në vendin fqinj.
Por Ditmir Bushati u shpreh se në një të tretën e territorit maqedonas banojnë shqiptarë, ka tre Universitete shqiptare dhe tre televizione të mëdha ku flitet shqip. Ndaj, sipas tij kjo marrëveshje gabimisht barazon statusin e pakicave kombëtare.
Bushati tha gjithashtu se kjo marrëveshje nuk ka asnjë vlerë të shtuar për shqiptarët, pasi në Maqedoninë e Veriut shqiptarët janë shtetformues kurse maqedonasit në Shqipëri janë pakicë kombëtare.
Po ashtu Bushati thotë se një marrëveshje e tillë mund të bëhej me Ukrainën dhe Australinë për mos humbur kultura e shqiptarëve aty, por jo me Maqedoninë ku gjuha shqipe është gjuhë zyrtare, kryeparlamentari është shqiptar, në qeveri dhe parlament flitet shqip si dhe në procese gjyqësore mund të flitet shqip.