Ish-presidenti Bujar Nishani i ka dhënë përgjigje pyetjes së shumë diskutuar kohëve të fundit në politikën shqiptare. I pyetur nga gazetari Roland Qafoku, nëse kryetari i Partisë Demokratike do japë dorëheqjen nëse humb zgjedhjet, është shprehur se askush nuk është i pazëvendësueshëm.
Ajo që bie në sy në përgjigjen është pakuptueshmëria e lehtë e fjalës së tij, e cila të rikujton fjalimet e ish-kryeministrit Fatos Nano.
Sipas tij kjo nuk mund të jetë temë diskutimi sepse kjo pyetje e politizon situatën.
“Unë e kam dëgjuar edhe këto ditë këtë. Të diskutosh apo devijosh diskursin politik para zgjedhjeve te mundësia e largimit të kryetarit dhe probabiliteti i largimit të kryetarit, absolutisht e fut të gjithë subjektin tënd politik, e fut në tezën e disfatës. Politika është perceptim dhe ti e di ndoshta më mirë se sa unë se je analist dhe gazetar i vjetër. Askush nuk është i pazëvendësueshëm. Por që ta devijosh diskursin politik a do të iki, a s’do të iki lideri, ti e ke futur forcën tënde politike në një diskurs absolutisht disfatist që nuk i shërben asgjë. Prandaj, unë mendoj që do të jetë shumë gabim për këdo nga ana e Partisë Demokratike dhe përfaqësuesve të saj nëse e kthejnë në diskutim. Nuk mund të jetë objekt diskutimi kjo gjë. Ne futemi në zgjedhje për të fituar. Ju si gazetar jeni në të drejtën tuaj dhe ju kërkoni të eksploroni mendime dhe qëndrime por kjo nuk mund të bëhet në parti.”, është shprehur Nishani.
