Gjykata e Posaçme për Korrupsion dhe Krimin e Organizuar është duke anashkaluar dosjet e nxehta që lidhen me krimin e organizuar dhe korrupsionin.
Pas dosjes së bujshme 184 lidhur me vjedhjen e zgjedhjeve, e cila u dërgua për gjykim në Dibër, një tjetër dosje e nxehtë, ka përfunduar në gjykatat e rretheve. Kështu Gjykata dhe Prokuroria e Posaçme ka dërguar dosjen ‘Bajri’ në Prokurorinë e Shkodrës pasi ka konstatuar se nuk është kompetencë e SPAK.
Ndaj të akuzuarve Safet Bajri, Ilir Bajri, Behar Bajri, Astmer Bilali, Ismet Idrizi, Emrah Plaku, Enver Bajri ka rënë akuza e grupit të strukturuar e grupit kriminal dhe do të hetohen tashmë në Prokurorinë e Shkodrës, transmeton raporton News 24.
Enver dhe Behar Bajri u përfaqësuan nga avokati Alban Bengasi ndërkohë Safet Bajri, Ilir Bajri, Astmer Bilali,Ismet Idrizi dhe Emrah Plaku janë përfaqësuar nga avokati Arbër Hoxhaj.
Më 22 shtator të 2018 11 persona u arrestuan në kuadër të Operacionit ‘OAZ’ ndër të cilët edhe Safer dhe Enver Bajri.
Ata akuzoheshin në fillim për një sërë veprash penale si “Vrasje me dashje e mbetur në tentativë”, në bashkëpunim, “Vrasje me dashje”, e kryer në bashkëpunim, “Prodhim dhe mbajtje pa leje të armëve dhe municioneve luftarake”, “Organizim i lotarive të palejuara”, “Pastrim i produkteve të veprës penale” të kryer në bashkëpunim, “Shtrëngim me anë të kanosjes ose dhunës për dhënie të pasurisë”, kryer në bashkëpunim, “Përkrahje e autorit të krimit”, ‘Moskallëzim krimi”, “Prodhim e shitje e lëndëve narkotike”, të gjitha këto të kryera në kuadër të një grupi të strukturuar kriminal. Grupi akuzohej për dy vrasje, njëra në 7 shkurt 2001, ku u vra shtetasi A.T., dhe ngjarje e datës 20 qershor 2002, ku u vra shtetasja F.H., 15 vjeçe.
Gjithashtu ata janë akuzuar për kanosje ndaj disa shtetasve për të dhënë një shumë parash. Megjithatë, pas shumë kohësh aktivitet kriminal, Safet Bajri do të binte në pranga në Tiranë në 2018 kurse Behar Bajri dhe Samet Halluni u arrestuan në Holandë dhe u ekstraduan në Shqipëri. Mes të arrestuarve ishin dhe dy figura shumë të shquara të sportit shqiptar, ish- portieri i Vllaznisë Armir Grimaj i cili u lirua për mungesë provash si dhe ish- kampioni i boksit Astmer Bilali i cili vijon të mbetet në qeli.
