Vijon me takime të shumta starti i punës në vendin tonë të ambasadores amerikane. Ajo ka njoftuar nëpërmjet një mesazhi se ka qenë në një takim me anëtarët e Këshillit të Lartë Gjyqësor në vend ku mësohet se kanë ndarë mendime për çështjen e përmirësimit të punës në këtë sistem. Pas një morie takimesh me krerë shteti, e deri tek institucionet që pretendohet që do reformojnë sistemin e drejtësisë në vend, Yuri Kim tashmë ka dhënë një mesazh të qartë edhe tek një tjetër sektor i drejtësisë.
Zyrtarisht bëhet me dije se ambasadorja e SHBA në Tiranë Yuri Kim ka takuar këtë të premte anëtarët e Këshillit të Lartë Gjyqësor. Përmes një mesazhi në rrjetin social, ambasada e SHBA ka zbardhur detaje nga takimi. “Ambasadorja Kim u takua sot me anëtarët e Këshillit të Lartë Gjyqësor dhe i përgëzoi ata për përpjekjet e tyre në përmirësimin e administrimit të gjyqësorit dhe gjykatave. Ajo theksoi përkushtimin e Shteteve të Bashkuara për të ngritur një sistem drejtësie të paanshëm, bazuar në sundimin e ligjit, ndërsa Shqipëria përpiqet të përmbushë potencialin e saj të plotë duke krijuar institucione të forta demokratike.”-thuhet në njoftim.
