Detaje të reja kanë dalë në dritë nga ndalimi i botuesit të njohur Henri Çili. Sipas informacioneve paraprake, pasi deri më tani nuk ka një njoftim nga policia, dyshohet se Çili ka përfituar prona dhe para nga i ati i Arbion Alikos, i cili është i dënuar përjetë për vrasjen e efektivit Ibrahim Basha në vitin 2014, gjatë aksionit të policisë në Lazarat.
Sipas dyshimeve të deritanishme, Çili ka përfituar shuma të konsiderueshme parash, apartament, dyqan dhe prona të tjera duke i premtuar të atit se do ta ndihmonte t’i nxirrte djemtë nga burgu përmes ndikimit te gjykatësit.
Arbion Aliko, pjesë e grupit të zjarrit, është dënuar me burg përjetë për vrasjen e efektivit të RENEA-s, Ibrahim Basha, ndërkohë që vëllai i tij është dënuar me 20 vite.
Ibrahim Basha mbeti i vrarë në Lazarat, gjatë aksionit për të kapur grupin kriminal që kishte nisur të shtënat ndaj policisë lokale, operacion antikanabis në 2014-ën. Gjatë këtij aksioni u plagosën edhe dy kolegë të tij Jetmir Isaj dhe Perlat Hamitaj.
Bashkë me Henri Çilin janë arrestuar edhe 12 persona të tjerë. Të arrestuarit do të ndikonin tek gjyqtarët për të liruar anëtarët e bandës së Lazaratit.
Një nga të ndaluarit është edhe drejtori juridik në Universitetin Europian të Tiranës, Ilir Korbi.
Të 12 të arrestuarit akuzohen për korrupsion pasiv dhe aktiv në fushën e drejtësisë, ndërsa hetimi ka nisur që shtatorin e vitit 2019.
Henri Çili njihet si pronar i Universitetit Europian të Tiranës dhe botues i gazetës ‘Liberale’.
