Aktori i madh, njëkohësisht aktivist i zjarrtë në mbrojtje të Teatrit Kombëtar, Edmond Budian i është bashkuar tubimit të thirrur nga Presidenti Ilir Meta kundër qeverisë, ose siç thonë ata kundër grushtit të shtetit.
Nga foltorja e Presidencës e vendosur në Bulevardin “ Dëshmorët Kombit”, Budina ka thënë se ndodhim në të njëjtën situatë si 30 vite më parë.
Ai ka thënë se duhet mbrojtur Shqipëria nga diktatura e re dhe për ta bërë këtë gjë sipas tij duhet luftuar mafia e korrupsioni.
“30 vite më parë ne kishim një ëndërr, ta bënim Shqipërinë si gjithë Evropa. Mbas 30 vitesh kthehem këtu për ta bërë sërish Shqipërinë si gjithë Evropa. Për ta mbrojtur nga kjo diktaturë e re, e cila po mundohet të përdhosë vendin. Ne jemi këtu për të luftuar mafien, korrupsionin. I dalim në mbrojtje Presidentit për të mbrojtur Kushtetutën.
Kam ardhur këtu për mbrojtur demokracinë, lirinë e vendit tonë.
Ne nuk duhet të lejojmë që vendi ynë të zbrazet. Unë e kam qenë emigrant dhe e di se çfarë do të thotë të të vdesin prindërit dhe të mos vish t’i takosh. E di se çfarë do të thotë të mos kesh për të ngrënë dhe të shohësh atë Parlament. “-është shprehur aktori.
Ai ka shtuar më tej se neo-diktaturë i duhet thënë se nuk ka për të fituar.
“Jemi këtu për t’i thënë neo-diktaturës se nuk ka për të fituar. Sulltani nuk ka për t’ja dalë kurrë të vendos sulltanatin e tij. Nuk ka për t’ja dalë të shkatërrojë Shqipërinë.”-deklaroi ndër të tjera Budina./Fjala.al/