Një anije greke për pak sa nuk ka shkaktuar një tragjedi në detin Egje teksa ka tentuar të mbytë një varkë me emigrantë.
Ekuipazhi i anijes greke tenton gati ta përmbytë varkën e emigrantëve teksa njëri prej tyre qëllon me një objekt edhe disa prej refugjatëve. Kjo ka sjellë edhe reagimin e ashpër të Turqisë, duke akuzuar Athinën se po tenton të vrasë emigrantët, që erdhën prej kufirit turk.
Emigrantët sirianë janë shndërruar në një çështje mjaft serioze midis Greqisë dhe Turqisë, pasi kjo e fundit hapi kufirin për refugjatët drejt vendeve evropiane për shkak të pamundësisë për të përballuar numrin e tyre.
Por, shumë emigrantë kanë mbetur në kufirin midis Turqisë dhe Greqisë pasi kjo e fundit nuk lejon që të kalojnë në tokën e saj, duke krijuar një krizë të madhe humanitare.
Në këtë mënyrë, shumë emigrantë kanë tentuar të ikin me gomone për të arritur në Greqi përmes ishujve, siç është dhe ishulli Lesbos.
Por, siç duket edhe në këto pamje Greqia po tregohet e pamëshirshme me emigrantët aq sa tenton t’i hedhë edhe në det.
