Sokol Sadushi ka reaguar pas akuzave të Partisë Demokratike se zyrtari tjetër i lartë i përfshirë në skandalin me botuesin e njohur Henri Çili është ai.
Ai shprehet se pas këtyre akuzave e ndjete një obligim të dilte në një deklaratë për mediat pasi sipas tij këto supozime të Partisë Demokratike nuk janë gjë tjetër vetëm përpjekje për të ulur figurën e tij tashmë që ai do të kandidojë si gjyqtar i Kolegjit Administrativ në Gjykatën e Lartë.
I bindur ai shtoi se me botuesin Henri Çili nuk ka pasur komunikim as të drejtëpërdrejtë dhe as të tërthortë për asnjë cështje për më tepër ato që lidhen me cështjet gjyqësore penale.
Deklarata për media e Sokol Sadushit
Duke marrë shkas nga përmendja e emrit tim në deklarime politike të bëra këto ditë nëpërmjet medias, ndihem i obliguar të informoj opinionin publik dhe mediatik se: Çdo pyetje retorike e shtruar këto ditë, nëpërmjet deklarimeve politike, mediatike dhe që vë në dyshim integritetin moral e profesional, duket se ka për qëllim të dëmtojë personalitetin tim, pikërisht në këtë moment që lidhet me procedurën e nisur për kandidimin si gjyqtar i Kolegjit Administrativ në Gjykatën e Lartë.
Deklaroj me përgjegjësinë time të plotë se, me Z. Henri Çili prej shumë kohësh nuk kam pasur asnjë komunikim të drejtpërdrejtë apo të tërthortë, në ambiente publike apo private, për asnjë çështje, përfshirë ato që implikojnë personalitetin tim dhe, për më tepër, që lidhen me çështje gjyqësore penale.
Çdo deklarim i bërë ndaj personit tim mbi këtë ngjarje nuk përputhet me të vërtetën, sikurse jam i bindur se do të rezultojë në përfundim të procesit penal. Në rrethana të tilla, kur çështja dukshëm është me interes publik, sugjeroj se nëse është i vërtetë fakti mbi takimin e realizuar me “një funksionar të lartë të drejtësisë“, do të ishte me vend që organi i prokurorisë të sqarojë opinionin publik mbi detajet e këtij takimi. Informimi i opinionit publik i shërben, gjithashtu, ruajtjes dhe forcimit të autoritetit të pushtetit gjyqësor dhe forcon klimën e besimit në organet që ushtrojnë ndjekjen penale.
