Paraplegjikët dhe tetraplegjikët në Shqipëri janë 6 mijë ose 7 mijë persona. Ata nuk trajtohen me shërbime shëndetësore falas, nuk marrin ilaçet me rimbursim dhe nuk kanë infrastrukturën e nevojshme për të jetuar të barabartë me qytetarët e tjerë të këtij vendi.
I vetmi shërbim që marrin falas është ai i transportit publik, i cili kohët e fundit u është lënë në dorë shoqërive të transportit të vendosin nëse jua njohin ose jo të drejtën për të udhëtuar falas. “Na u premtua se do të kishim mbështje ekonomike, por deri tani nuk është bërë asgjë, ka 6 vjet që presim”.
Kështu përmbledh me pak fjalë kushtet me të cilat përballet kryetari i Shoqatës së Paraplegjikëve dhe Tetraplegjikëve të Shqipërisë, Adem Demushi.
Në prononcim për gazetën “Fjala” ai shprehet se nuk është vënë në dijeni në lidhje me ndryshimit e fundit ligjore për kriteret e reja të vlerësimit të dosjeve për pagesat e paaftësisë. Shqyrtimi për përfitim të pagesës së paaftësisë do të kryhet nëpërmjet një skeme të re.
Demushi pohon se është ftuar në një tryezë nga grupi i punës, por e ka braktisur atë, pasi, sipas tij, nuk po merreshin në konsideratë dhe nuk po diskutoheshin problemet që shqetësojnë këtë kategori.
Demushi, kanë hyrë në fuqi ndryshimet ligjore për skemën kriteret e reja të vlerësimit të dosjeve për pagesat e paaftësisë. A jeni në dijeni të këtyre ndryshimeve?
Jom nuk jam në dijeni. Para pak kohësh u organizua një tryeze për ndryshimetm por unë e braktisam sepse nuk po merreshin në konsideratë kërkesat tona. Di që do të bëhen ndryshime, por nuk e di me saktësi se çfarë ka ndryshuar.
Çfarë shërbimesh marrin falas paraplegjikët dhe tetraplegjikët? A merrni shërbime shëndetësore falas? A ju rimbursohen ilaçet?
Nuk kemi marrë asnjë shërbim falas, as në spital, as askund. As ilaçet nuk i marrim falas. Vetëm transporti urban, edhe atë e kanë lënë që ne të marrim transport falas me miratim të firmave private. Infrastruktura është copë-copë, u bë një projekt nga Komiteti Evropian që në 2016 dhe s’është vënë akoma në zbatim.
Sa anëtarë ka Shoqata e Paraplegjikëve dhe Tetraplegjikëve të Shqipërisë?
Ne jemi 320 anëtarë.
