Paratë dhe pronat e padeklaruara të fituara nga puna në të zezë do të legalizohen! Do të kalojnë në banka e regjistra pronash kundrejt vetëdeklarimit brenda një afati përcaktuar. Mbi kapitalet do të aplikohet një taksë, e cila nuk do të jetë më e vogël se 3 % dhe nuk do të jetë më e madhe se 5 %.
Përfitues të kësaj skeme amnistie do të jenë shqiptarët që kanë punuar brenda dhe jashtë vendit, por me një kusht që paratë dhe pronat e legalizuara të jenë të ardhura nga puna. Me përfundimin e afatit të amnistisë çdo para që gjendet jashtë sistemimit do të konsiderohet e ardhur e jashtëligjshme dhe poseduesi i saj duhet të japë llogari para ligjit. Nisma e qeverisë shihet si thikë me dy presa.
Nga njëra anë ligjërimi i të ardhurave nga puna, të cilat për arsye të ndryshme janë jashtë sistemit, dhe, nga ana tjetër, lindja e precedentit për personat që kanë zbatuar ligjin, nuk kanë fshehur të ardhura.
Automatikisht të përjashtuar nga ky benefit janë paratë që kanë origjinë krimin. Nuk do të përfitojnë nga amnistia as politikanët, gjyqtarët, prokurorët dhe rrethi i tyre familjar. Nga lista e përfituesve janë përjashtuar edhe zyrtarët e lartë që kanë lënë para mënjanë dhe s’mund të argumentojnë se këto të ardhura i kanë kursyer nga rroga.
Kjo është përgjithësisht skema e prezantuar nga kryeministri Edi Rama në kongresin e Partisë Socialiste. Nisma qeveritare së shpejti do të konkretizohet me një draft, i cili do të kalojë për konsultim publik me grupet e interesit, do të marrë “dakortësinë” e institucioneve financiare ndërkombëtare e më pas do të kalojë në parlament për votim.
Menjëherë pas lançimit të projekt-idesë nga kryeministri Edi Rama, u kristalizuan edhe opinionet ‘pro’ dhe ‘kundra’ amnistisë së kapitaleve. Të gjithë palët bien dakord se kjo nismë do t`i japë një frymëmarrje ekonomisë, por ajo mund të shërbejë si precedent për qytetarët dhe bizneset që kanë zbatuar ligjin dhe nuk kanë punuar në të zezë apo nuk kanë fshehur të ardhurat.
Suksesi i amnistisë do të varet nga kushtet teknike që do të parashikohen në draft. “Çelësi i suksesit” është diferencimi i qartë mes atyre që kanë punuar dhe nuk kanë deklaruar dhe atyre që paratë i kanë të ardhura nga puna e paligjshme.
Falja
Qytetarëve u falen të gjitha detyrimet e prapambetura si pasojë e mosdeklarimit të pasurive të tyre. Aktualisht është akti i veprës penale pasi individi ka fshehur pasurinë dhe ka shmangur në këtë mënyrë tatimin 15 % mbi të ardhura.
Me hyrjen në fuqi të amnistisë individët apo bizneset që kanë fshehur pasurinë jo vetëm që nuk do të jenë më subjekt i veprës penale por të paguajnë në këmbim të legalizimit të saj një taksë që do të vendoset nga qeveria. Kjo taksë padyshim do të jetë shumë herë më vogël se 15% që është tani. Është artikuluar se taksa mund të jetë nga 3 deri në 5 %. Amnistia nuk do të ketë avantazhe vetëm individët edhe subjektet që nuk kanë deklaruar apo kanë fshehur të ardhurat, por do të ketë efete pozitive edhe në ardhurat në arkën e shtetit.
Precedenti
Lind pyetja, po bizneset apo individët që kanë deklaruar të ardhurat dhe kanë paguar detyrimin tatimor prej 15 %, a po ndëshkohen me këtë amnisti?! Ekspertët mendojnë se ekonomia nuk zhvillohet duke marrë masa përjashtimore apo duke shkelur rregullat e tregut dhe, njëkohësisht, duke krijuar favore për shtresa të caktuara. Nisma ngre pikëpyetje shumë të mëdha për shkak të dekurajimit që iu bën atyre që paguajnë rregullisht taksat.
3 %
Është taksa që pritet të paguajnë qytetarët për të legalizuar paratë e tyre. Qytetarëve ju falen të gjitha detyrimet e prapambetura si pasojë e mosdeklarimit të pasurive të tyre të siguruara duke punuar në të zezë brenda ose jashtë Shqipërisë
5 %
Pritet të vendoset taksa për bizneset që kanë fshehu të ardhurat. Mësohet se qeveria po bën gati draftin e amnistisë fiskale, e cili do të votohet shumë shpejt në parlament. Sipas projektit, bizneset do të kenë mundësi të legalizojnë fitimet e fshehura në vite, ndërsa qytetarët të ardhurat nga puna informale.
15 %
Sipas ligjit në fuqi të ardhurat tatohen në masën 15 %. Individëve dhe bizneseve pritet tu lehtësohet nga 10 -12 % përqind barra e taksës mbi të ardhurat. Qeveria beson se kjo amnisti do të favorizojë bizneset e vogla dhe individët.
Përjashtimi
Amnistia përjashton të ardhurat nga korrupsioni i zyrtarëve dhe paratë e gjeneruara nga aktivitetet kriminale si trafiku, prostitucioni apo veprat e tjera që parashikohen në paketën anti-KÇK. Megjithatë mënyra se si qeveria do të garantojë që paratë e krimit të mos ligjërohen përmes amnistisë mbetet për tu parë.
