Spitali Infektiv në Tiranë është kthyer në karantinë dhe gjithë vëmendja është përqendruar aty. Ai është boshatisur nga pacientët e tjerë dhe do ketë dhoma vetëm për trajtimin e personave që janë me koronavirus.
Policia madje vendosi edhe shiritin e perimetrit në kuadër të vendimit të qeverisë që shoqëruesit dhe familjarët e pacientëve nuk duhet të qëndrojnë në ambientet spitalore vetëm nëse ka rekomandim nga Drejtoria Spitalore.
Jane gjithsej 76 shtretër që do të përdoren për të infektuarit me koronavirus. Personat që do të drejtohen në sallën e konsultave do të futen nga një rrugë e improvizuar brenda oborrit të Spitalit Infektiv pasi sheshi po përdoret vetëm për hyrjen e personelit të autorizuar. Ndërkohë një automjet i Bashkisë së Tiranës ka spërkatur me ujë dhe me klor rrugën para Spitalit Infektiv për të bërë të mundur dezinfektimin e saj.
