Një 57-vjeçar japonez ka ndërruar jetë pasi ishte infektuar me koronavirus. Ai e kishte përhapur qëllimisht virusin duke shkuar nëpër lokale edhe pse mjekët e kishin paralajmëruar dhe i kishin thënë të vetizolohej.
Sipas agjencisë së lajmeve Kyodo, 57-vjeçari i cili jetonte në qytetin Gamagor në prefekturën Aichi, në fillim të marsit ishte diagnostifikuar me koronavirus. Menjëherë ai ishte shtruar në repartin e sëmundjeve infektive, ndërsa mjekët i kishin propozuar vetizolim.
Në vend që të izolohej ai kishte shkuar nëpër lokale. Ai kishte njoftuar familjarët se ishte infektuar me koronavirus, dhe se po shkonte për të përhapur virusin.
Në një prej lokaleve që kishte vizituar kishte pasur kontakt me të paktën dy persona, ku njëri prej tyre disa ditë më vonë rezultoi me koronavirus. Deri më tani në Japoni janë infektuar më shumë se 1.500 persona, ndërsa kanë humbur jetën 37 persona.