NASA ka njoftuar mbylljen e dy qendrave të prodhimit dhe testimit të raketave hapësinore, pasi një inxhinier në njërën nga strukturat rezultoi pozitiv me koronavirus. Kjo hedh potencialisht në erë ëndrrën ambicioze të një misioni në Hënë me astronautë në vitin 2024.
“Të dyja qendra tona në Misisipin e Jugut dhe Mishud, rreth 65 km larg nga Nju Orlinsi do të ndalojnë operacionet”- deklaroi administratori i NASA-s, Xhim Brajdstin në një deklaratë për mediat. Kjo masë, është në zbatim të “Fazës 4” të udhëzimeve të NASA-s për përgjigjen
ndaj epidemisë, që rekomandon një mbyllje të plotë të objekteve në kushtet e emergjencës.
“Ndryshimi u bë për shkak të rritjes së numrit të rasteve me Covid-19 në komunitetin përreth qendrës… dhe të një rasti të konfirmuar në mesin e ekipit tonë”-shkroi Brajdstin.
Ai shtoi se “ndërsa nuk ka raste të konfirmuara në Mishud, ky objekt po kalon në “Fazën 4” për shkak të rritjes së numrit të rasteve me Covid-19 në 19 të tilla zonën lokale”. Ekipet e NASA-s dhe kontraktorët e saj, do të bëjnë tani një ndëprerje të plotë të aktivitetit, që e vendos të gjithë qendrën në një gjendje të sigurt, derisa të rifillojë puna.
Tani për tani, qasja në të dyja qendrat, do të kufizohet vetëm për ekipin që merret me prodhimin e pjesës skeletike të raketave, minimumi i nevojshëm për të mbajtur të sigurtë objektet e teknologjisë së lartë. Ndërkohë, të gjitha projektet e aprovuara më parë, do të pezullohen në pritje të një njoftimi të dytë.
Ndërkohë Brajdstin vuri në dukje, se do të ketë “ndikime në misionet e NASA” për shkak të këtyre mbylljeve, përfshirë punën me anijen hapësinore “Orion”, që planifikohet të dërgojë astronautët amerikanë në Hënë në vitin 2024. Brajdstin thekson se shëndeti i personelit, mbetet një “përparësi kryesore”.
Agjensia Qendra Kërkimore Ajmes në Kaliforni, ka urdhëruar gjithashtu një mbyllje të aktivitetve të saj në përputhje me “Fazën 4”, pasi një punonjës tjetër doli pozitiv me Covid-19 javën e kaluar.
Ndërkaq, një sërë objektesh të tjera – përfshirë Qendrën Hapësinore Xhonson në Hjuston, janë zhvendosur në “Fazën 3”, duke e kufizuar numrin e punëtorëve dhe stafit tjetër, që lejohet të qëndrojë në qendër gjatë emergjncës së shkaktuar nga koronavirusi./S.T
