Në Maqedoninë e Veriut shënohet viktima e tretë nga koronavirusi.
Lajmi është konfirmuar nga vetë ministri i shëndetësisë. Bëhet fjalë për një grua 66-vjeçare nga Dibra, e cila ka qenë prej të parave të shtruara në Qëndrën Klinike të Shkupit.
Pacientja e ndjerë prej disa ditësh ishte në gjendje të rëndë dhe mbahej në respirator, ndërsa në spital gjendet edhe bashkëshorti i saj.
Ndërkohë, Ministria e Mbrojtjes në Maqedoninë e Veriut ka lajmëruar se dy pjesëtarë të Ushtrisë kanë rezultuar pozitiv me koronavirus (Covid-19), ndërsa që të dy nuk kanë udhëtuar jashtë vendit.
“Të dy pjesëtarët e Armatës, një nënoficer dhe një ushtar kanë punuar në garnizonin e Shkupit. Njëri prej të infektuarve ka punuar në restorantin ushtarak në kazermën e Ilinden si ndihmës”, njoftojnë nga Ministria e Mbrojtjes.
Nga Ministria e Mbrojtjes theksojnë se janë marrë të gjitha masat menjëherë pasi janë vërtetuar rastet në fjalë.
“Restoranti ushtarak është dezinfektuar plotësisht dhe janë marrë të gjitha masat e nevojshme për mbrojtje sipas protokolleve epidemiologjike. Restoranti do të mbyllej për 24 orët e ardhshme. Të gjithë që supozohen që kanë pasur kontakt me kontakt me personat e infektuar tashmë janë në vetizolim”, shtojnë nga Ministria e Mbrojtjes.