Ai gjendet gjithjë aty ku i thotë misioni! Në dyert e të pamundurve, të pashpresëve, të paushqyerve e të harruarve. Troket në dyer që s’janë më të tilla që prej 26 nëntorit të një viti më parë kur Shqipëria u trondit themelesh nga ai tërmet shkatërrues, ndërsa çon ndihma për çdo familje, individ e kryesisht të pamundur.
Si ato ditë tmerri, edhe sot në këto ditë izolimi nga një vrasës i lëshuar, s`dihet nga ku, që ka pllakosur jetën e miliona njerëzve në botë, sërish ai gjendet tek banorët e zonës së vet. Si atëhere edhe sot, me mjetin e mbushur me mall; ushqime, detergjente, veshmbathje e deri edhe shtretër e dyshekë.
Ky është Muharrem Vrana, hoxha i Fushë-Krujës që ka vijuar duke ndarë ndihma për të gjithë fshatin. Banorët, të cilët ishin ndër më të dëmtuarit me 26 nëntor, e kanë falënderuar njeriun që nuk i harroi asnjëherë. Ata e dinë se atje ku janë, tashmë në këtë kohë virusi të çmendur, janë larg të tërheqin vëmendjen, e për pasojë prania i hoxhës aty i bën të ndjejnë shpresë dhe besim se mund t`ja dalin në këtë kohë frike, paniku dhe ankthi.
Muharrem Vrana është në aktivitet të pandërprerë përgjatë më shumë se katër muajve në tërë zonën e Krujës, dhe konkretisht ai ka dhuruar ndihma në familjet e prekura nga tërmeti. Ndërsa pas shpërthimit të virusit ‘Covid-19’, sërish ai është gjendur pranë familjeve në nevojë, duke lehtësuar sadopak hallet e panumërta që ata banorë po përjetojnë që nga 26 nëntori.
Sipas të dhënave që vijnë nga banorët e zonës mësohet se fshati Bubq është një nga zonat më të dëmtuara dhe se një pjesë e mirë e tyre jetojnë në kushte të vështira ekonomike nga humbja e banesave. Hoxha me humanizmin e tij iu ka qëndruar gjithnjë pranë me kontributet e siguruara prej tij pa patur nevojën e asnjë shtetari apo të ndonjë biznesmeni milioner.
Ndaj banorët e Bubqit janë mirënjohës për njeriun që i kujton në këtë situatë të vështirë, ku gjithë ditën iu thuhet të lajnë duart e të mbajnë higjienën e pastër, po në fakt ata nuk kanë as ujë dhe as sapun për ta bërë diçka të tillë, jo më banesë për ta dizenfektuar me lloj-lloj detergjenti të rekomanduar prej këshillave të dala nga Organizata Botërore e Shëndetësisë!
