Pandemia e koronavirusit të ri (COVID-19) pritet të shkaktojë ndërprerjen më të madhe të aktivitetit ekonomik global që nga Lufta e Dytë Botërore, theksoi Banka Europiane për Rindërtim dhe Zhvillim (BERZH).
“Kjo ndërprerje do të ndikojë në ekonomitë në zhvillim të bankave dhe rikuperimi i shpejtë nuk është i garantuar”, bëri të ditur Banka në një deklaratë.
Në skenarin pozitiv të bankës, normaliteti pritet të kthehet në gjysmën e dytë të vitit 2020, por nëse izolimet vazhdojnë shumë më gjatë, efektet në ekonomi do të jenë më të thella.
“Kjo do të ketë një ndikim negativ në shkallën e mundshme të rritjes afatmesme dhe mund të rezultojë në dëmtim të thellë strukturor të industrive të shërbimit të konsumatorit, si linjat ajrore, kinematë dhe restorantet, megjithëse të tjerat, përfshirë furnizimet ushqimore, mund të përfitojnë”, vijon deklarata.
“Izolimet do të shkaktonin një kosto të madhe fiskale dhe do të rezultonin në rritje të mprehta të borxhit publik. Këto nivele të reja të borxhit mund të jenë të përballueshme në disa vende për shkak të interesave shumë të ulëta të interesit, por ekonomitë e tjera mund të përballen me kufizime fiskale detyruese”, shtoi BERZH.
Pas shfaqjes dhjetorin e kaluar në qytetin Wuhan të Kinës, koronavirusi është përhapur në mbarë globin, duke shkaktuar mbi 88 mijë të vdekur ndërsa mbi 330 mijë janë shëruar deri më tani.