Kuvendi i Kosovës do të zhvillojë ditën e sotme një seancë të jashtëzakonshme, ku do të diskutojë pakon emergjente prej 320 milionë euro të propozuar nga Partia Demokratike e Kosovës, për t’u përballuar me krizën e shkaktuar nga koronavirusi.
Seanca e cila do të mbahet në orën 11:00, ku Lidhja Demokratike e Kosovës ka bërë të ditur se nuk do ta përkrahë pakon emergjente të propozuar nga PDK-ja. Ndërsa dy partitë e tjera opozitare, AAK dhe Nisma-AKR thanë se do të votojnë pro një pakoje të tillë.
Nga ana e saj, PDK i ka bërë thirrje gjithë partive parlamentare që të votojnë pro pakos emergjente për të përballuar situatën ekonomike të qytetarëve.
Pakoja emergjente e qeverisë në detyrë parashikohet të jetë 170.6 milionë euro, ndërsa ajo e propozuar nga partia opozitare PDK kap shifrën 320 milionë.
