Mjekët amerikanë kanë zbuluar një teknikë sipas së cilës, nëse pacientët e prekur me Covid-19, shtrihen në pozicion barkas mund të shërohen nga koronavirusi.
Sipas mjekëve kjo mënyrë i shpëton pacientët nga Covid-19 pasi rritet sasia e oksigjenit në mushkëritë e pacientëve
“Kështu shpëtojmë jetë, 100 për qind. “Është kaq e thjeshtë për t’u bërë, ndërsa kemi parë një përmirësim të jashtëzakonshëm te pacientët”, thotë Dr. Mangala Narasimhan, drejtor i shërbimit të kujdesit intensiv në rrjetin e kujdesit shëndetësor “Northwell Health”, i cili zotëron 23 spitale në New York.
Sipas mjekëve, pacientët e infektuar me koronavirus shpesh vdesin nga Sindroma Akute e Distresit Respirator (ARDS), e cila shfaqet për shkak të dëmtimit të parenkimës së mushkërive, transmeton CNN.
Nga e njëjta sindromë vdesin njerëzit me grip, pneumoni dhe sëmundje të tjera.
7 vjet më parë në një artikull të publikuar, në revistën New England Journal of Medicine, mjekët francezë tregonin se pacientët me sëmundje respiratore që ishin në ventilator, kishin më pak gjasa të vdisnin nëse shtriheshin barkas.
Mjekët amerikanë e kanë kryer këtë eksperiment me një pacient në Spitalin Hebraik, Long Island, ndërkohë që niveli i ngopjes së gjakut me oksigjen që depërtonte në mushkëritë e tij ishte rritur nga 85 në 98 për qind.
Pacientët në gjendje të rënduar zakonisht qëndrojnë kështu të shtrirë për rreth 16 orë në ditë, ndërsa pjesën tjetër e kalojnë në shpinë, në mënyrë që mjekët të kenë mundësi për t’i trajtuar dhe për t’u dhënë më lehtë ilaçet.
