Skuadra e Barcelonës është gjendur këtë vit përballë një sërë skandalesh e sherresh të brendshme, të cilat duket se janë duke e rrënuar klubin katalanas dhe kanë shuar “shkëlqimin” që ishte arritur me shumë mund
Viti 2020 ka ardhur plot skandale për skuadrën e Barcelonës, e cila së fundmi është përballur dhe me dorëheqjen e 6 menaxherëve përfshirë këtu ish-Zv. Presidentin Emili Rousaud.
Pas skandalit që bëri publik faktin se klubi katalanas ka paguar “I3 Venture” me 1 milion euro për të sulmuar dhe prishur imazhin e yjeve e legjendave të skuadrës kundërshtarë të Presidentit Josep Maria Bartomeu, tashmë ish-pjesëtarë të Barçës kanë zbuluar detaje të tjera.
Ish-Zv. Presidenti i Barcelonës, pasi dha dorëheqjen ka qenë shumë më i qartë në deklaratat e tij ku insiston mbi korrupsionin brenda klubit dhe hedh akuza të forta në lidhje me çështjen e “13 Ventures”. “Unë mendoj se dikush ka arritur në kuti,” tha ai, megjithëse pa treguar emrin e askujt. Ajo që biznesmeni katalan mund të guxojë të pohojë është se “ka pasur një seri parregullsish” që i kanë penguar ata “të kërkojnë rrugën tjetër” përveç dorëheqjes, tha Rousaud për ‘El Món a RAC1’.
Më tej ai ka akuzuar Presidentin e Barçës, Josep Maria Bartomeun, se pas auditimit të bërë në lidhje me skandalin e “13 Venture” u kërkoi që 6 menaxherët në fjalë të japin dorëheqjen. “Me sa duket (Bartomeu) tashmë e di se çfarë thotë ai auditim dhe është me siguri është një nga faktorët pse ai na ftoi të japim dorëheqjen.”-deklaroi Rousaud. Këto akuza sollën më pas edhe kundërpërgjigjen e klubit katalanas, i cili kërcënoi ish-zv/presidentin se do të përballet me veprime juridike. Dorëheqjen nga posti e kanë dhënë menaxherët Enric Tombas, Silvio Elias, Maria Teixidor, Josep Pont dhe Jordi Calsamiglia si dhe ish-Zv./Presidenti Emili Rousaud.
Ndërkohë rikujtojmë se që në ditët e para të vitit 2020, Barça gjend përpara përplasjeve e skandaleve. Përplasjet e brendshme Messi-Abidal nga ana tjetër tronditën fort themelet e klubit katalanas. Ndërsa Drejtori Sportiv fajësonte lojtarët për largimin e ish-trajnerit Ernesto Varverde, ylli i skuadrës i kërkoi Erik Abidal që të fliste me emra konkretë e të mos aludonte.
Këto përplasje dhe skandale ku përfshihet së fundmi dorëheqja e kandidatit të vazhdimësisë së Bartomeut, Rousaud dhe akuzat e tij ndaj klubit dhe drejtuesit aktual janë duke e zhytyr akoma më thellë Barçën në krizën që ka filluar në janar e që duket se ka për të zgjatur edhe për shumë kohë përpara. Barcelonës tashmë i duhet shumë punë që të rikthejë shkëlqimi dhe vëmendjen e të gjithëve të sukseset si skuadër./Fjala.al/Katerina Tafa/
