Në një studim të ri të kryer në Nju Jork u ekzaminuan 5.700 pacientë me koronavirus. Nga studimi rezultoi se presioni i lartë i gjakut ishte faktori kryesor që rëndonte shëndetin e pacientëve, i ndjekur nga mbipesha dhe diabeti.
Studimi, i cili është i pari i këtij lloji në Shtetet e Bashkuara u krye midis 1 marsit dhe 4 prillit.
“Ky është një virus vdekjeprurës, dhe ne i nxisim pacientët që janë më të moshuar, të cilët kanë sëmundje kronike si hipertensioni dhe diabeti, nëse kanë simptoma, duhet të thërrasin urgjent mjekun”, tha për FOX Business, Karina Davidson, nënkryetare e lartë e kërkimit në Northwell Health.
Studimi u botua në Gazetën e Shoqatës Mjekësore Amerikane të mërkurën dhe tregoi se hipertensioni (57 për qind), mbipesha (41 për qind) dhe diabeti (34 për qind) ishin faktorët kryesorë që rëndonin gjendjen e pacientëve me koronavirus.
LEXONI STUDIMIN E PLOTË ⇓⇓
Studimi amerikan mbi korona… by Bardhi Quku on Scribd
Studimi zbuloi gjithashtu se pacientët me diabet kishin më shumë të ngjarë të merrnin ventilim invaziv.
Sipas studimit, 88 për qind e pacientëve që u futën në ventilim kanë ndërruar jetë.
Pacientët që iu nënshtruan studimit “kishin mbërritur në spital në fazat e vonshme të infeksionit dhe shumë prej tyre nuk merrnin frymë kur kanë arritur në spital”, tha Davidson.
Gjithsesi, studimi sipas Davidson “është një studim vëzhgues, kështu që duhet të jemi të kujdesshëm.”
Mosha mesatare e pacientëve që iu nënshtruan studimit, ishte 63-vjeç dhe shumica prej tyre ishin meshkuj.
Shtetet e Bashkuara harxhojnë çdo vit miliarda për të luftuar sëmundjet kronike. Sipas Qendrës për Kontrollin dhe Parandalimin e Sëmundjeve, hipertensioni, i njohur gjithashtu si presioni i lartë i gjakut, i kushton Shteteve të Bashkuara rreth 131 miliardë dollarë në vit,
Sipas Shoqatës Amerikane të Diabeteve, kujdesi shëndetësor për njerëzit me diabet u llogarit nga 1 në 4 dollarë në Shtetet e Bashkuara për vitin 2017.
ADA vlerësoi se trajtimi i diabetit tip 1 dhe tip 2 kushtoi 327 miliardë dollarë atë vit, përfshirë 90 miliardë dollarë të humbur në produktivitetin ekonomik./Përshtati nga Fox News Business, për Fjala.al, B.Quku
