Një grup shkencëtarësh italianë kanë bërë një tjetër zbulim shkencor, sipas të cilit koronavirusi mund të merret edhe nga distanca të mëdha përmes grimcave mikroskopike që ndotin ajrin.
Sipas tyre nuk është rastësi që epidemia e koronavirusit ka shpërthyer pikërisht në mjedise me ajër të papastër, transmeton CBS News.
Në Itali edhe pse autoritetet po shqyrtojnë rikthimin e banorëve nëpër punët e tyre, studimet paralajmërojnë për një rrezik tjetër edhe më të madh nga koronavirusi.
Në të vërtetë, virusi do të mund të ishte shumë më ngjitës sesa që është menduar. Sipas shkencëtarëve italianë, virusi është zbuluar në grimcat mikroskopike që ndotin ajrin, e të cilat kryesisht koncentrohen në zonat industriale.
Në punimin e botuar në gazetën ndërkombëtare të kërkimeve mjedisore dhe shëndetit të popullatës, shkencëtarët u rekomandojnë të gjithë qytetarëve të bartin maska, sepse sipas tyre pa to distanca sociale prej dy metrave nuk është aspak e mjaftueshme.
Profesori Prisko Pishiteli nga Universiteti i Napolit së bashku me kolegët e tij, konsiderojnë se grimcat mikroskopike mund të bartin virusin në distanca të largëta.
Ata kanë marrë shembull zonën industriale përreth qytetit të Milanos, ku besohet të jetë cilësia më e dobët e ajrit në Evropë. Megjithatë, është edhe një prej rajoneve me numrin më të madh të infektuarve dhe vdekurve nga COVID-19.
