Ambasadorja Yuri Kim ka reaguar pas emërimit të tre anëtarëve të rinj në gjykatë dhe lidhur me nisjen e shqyrtimit të çështjeve në Dhomën e Këshillit.
Përmes një postimi në Twitter, Kim uron marrjen e detyrave nga këta gjyqtarë dhe thekson se Gjykatë e Lartë funksionale është thelbësore për zbatimin e reformës në drejtësi.
Kim: Urime gjyqtarëve të Gjykatës së Lartë për marrjen menjëherë përsipër të detyrave të tyre. Gjyqtarët po tregojnë vendosmërinë e tyre për të ofruar drejtësi në mënyrë efektive. Gjykatë e Lartë funksionale është thelbësore për zbatimin e reformës në drejtësi.
Gjykata e Lartë nisi ditën e djeshme të shqyrtojë çështje në Dhomën e Këshillimit.
Pas emërimit të tre anëtarëve të rinj në këtë gjykatë janë krijuar kushtet për të rinisur vlerësimin fillestar të rekurseve.
Gjykata e Lartë njoftoi se nisur nga akti normativ për situatën Covid-19 në mbledhjen e përgjithshme të gjyqtarëve është vlerësuar se do të vijohet menjëherë me shqyrtimin e çështjeve emergjente sikurse janë mosmarrëveshjet për juridiksionin, kompetencën, kërkesat për pezullimin e ekzekutimit të vendimeve etj., si edhe me shqyrtimin e rekurseve të çështjeve të themelit, nisur nga kriteri i kohës së paraqitjes së tyre për shqyrtim në Gjykatën e Lartë.
