Profesori Adrian Civici jep edhe parashikimin se çfarë pritet të ndodhë në ekonominë shqiptare pas krizës së shkaktuar nga pandemia. Në emisionin HARD TALK NGA ROLAND QAFOKU, ai deklaroi se do të duhet një periudhë gati një ose dy vjeçare që ekonomia të arrijë atje ku ka qenë.
–A është rikthyer situata në normalitet?
–Jo. Unë them se nëse në normalitet do arrijmë të futemi nga gushti, duhet të jemi shumë të lumtur.
-Si e përkufizoni normalitetin?
–Normaliteti quhet kur ekonomia vjen pak a shumë në situatën para pandemisë. Sektorët të fillojnë të funksionojnë. Që të gjithë sektorët të hapen gradualisht dhe të zhvillohet ajo lloj ndërthurjeje dhe bashkëpunimi siç ka qenë përpara nuk është çështje ditësh apo çështje javësh por është çështje që do kërkojë disa muaj. Dhe për këtë arsye në diskutimet që bëhen sot, vendet ndahen në disa kategori se si do ta kenë periudhën e ndërmjetme për rikthimin në normalitet. Në mënyrë simbolike janë tre simbole. Është simboli V, U dhe L.
V nënkupton kryesisht vendet e pasura që patën një rënie shumë të madhe por edhe ngritjen e kanë të shpejtë. Një periudhë e shkurtër, maksimumi 1-2 mujore dhe pastaj fillimi i ringritjes.
U nënkupton që ke një periudhë stanjacioni disa mujore por mund të shkojë edhe një ose dy vjet dhe pastaj fillon ringritja.
L është më e keqja sepse ti bie poshtë dhe mund të zgjasë me vite pa pasur asnjë mundësi që të ngrihesh.
-Ne ku jemi?
-Ne jemi tek U-ja. Unë them që do na duhet një periudhë 7-8 mujore që ne të fillojmë të ngrihemi. Nëse nuk do ketë një valë tjetër që të dëmtojë ekonominë shqiptare, në 2021-2022 të arrijmë atje ku kemi qenë./Fjala.al/Ke.Ba
https://www.youtube.com/watch?v=02zeSVYkw5U