Presidenti i Republikës Ilir Meta ka reaguar pas deklaratës së tre eurodeputetëve të publikuar nga PE, për çështjen e marrëveshjes së 5 qershorit dhe integrimin.
Meta falënderon partnerët europianë për mbështetjen dhe thotë se kushti i parë për negociatat është miratimi urgjent i Marrëveshjes së 5 Qershorit.
“Falënderoj partnerët tanë europianë për mbështetjen e fortë për çeljen e negociatave, ku kushti i parë është miratimi urgjent i Marrëveshjes së 5 Qershorit. “BACK ON TRACK” – S’mund të humbasim trenin e negociatave!”, shkruan Meta.
Reagimi i Metës vjen pasi eurodeputetët kryesorë dolën me një deklaratë, që u hoq e më pas u ndryshua nga PE.
Në thelb të deklaratës ishte zbatimi i plotë i marrëveshjes së 5 qershorit mbi reformën zgjedhore të nevojshme para fillimit të negociatave të pranimit, si dhe qeveria dhe opozita duhet të ruajnë konsensusin ndër-partiak.
Parlamenti Evropian publikoi sërish apelin e 3 eurodeputetëve për qeverinë shqiptare, i cili u fshi një ditë më parë. Nga një deklaratë në formë ultimatumi se çdo modifikim i marrëveshjes së 5 qershorit pa konsensus mund të rrezikojë integrimin, qëndrimi i tyre merr një formë më të zbutur duke nënvizuar rëndësinë e marrëveshjes dhe konsensusin për integrimin. Ja çfarë ka ndryshuar.
ISHTE:
“Ne presim që shumica parlamentare të miratojë ndryshimet e nevojshme pa dëmtuar konsensusin e arritur midis Qeverisë dhe Opozitës më 5 qershor. Çdo modifikim i Marrëveshjes pa arritur një konsensus me të gjitha partitë politike, mund të rrezikojë realizimin e Konferencës së Parë për negociatat e anëtarësimit, dhe për rrjedhojë të ngadalësojë procesin e integrimit europian”.
U BË:
“Ne presim që shumica parlamentare të miratojë ndryshimet e nevojshme pa dëmtuar konsensusin e arritur midis qeverisë dhe opozitës më 5 qershor. Është e rëndësishme të arrihet një marrëveshje, të ruhet dialogu dhe konsensusi me të gjitha partitë politike, në mënyrë që të mund të thirret konferenca e parë për negociatat e anëtarësimit, dhe për këtë arsye të vazhdojë procesin e integrimit evropian”./Bl.Ba/Fjala.al
