Thaçi flet pas intervistave në Hagë: Historia s’mund të rishkruhet nga askush, gjithmonë kam bërë më të mirën

113 563 lexime

77,342FansaPëlqeje

Presidenti i Kosovës Hashim Thaçi ka dalë me një deklaratë zyrtare pas katër ditësh intervistimi në Prokurorinë Speciale në Hagë, lidhur me aktakuzën e ngritur për krime lufte.

Përmes një video komunikatë në rrjetet sociale, Thaçi shprehet se ka respekt të plotë për procesin e zbardhjes, deri në fund, të së vërtetës dhe të rolit të tij në luftën çlirimtare për liri dhe pavarësi.
Thaçi deklaroi se historia e lavdishme e luftës çlirimtare dhe e shtetformimit të Kosovës së pavarur nuk mund të rishkruhet nga askush. Sipas tij, ky proces i radhës është në vazhdën e 21 vjetëve të akuzave, shpifjeve e fabrikimeve mbi UÇK-në dhe përpjekjeve të popullit të Kosovës për liri dhe shtet.
Kreu i shtetit të Kosovë deklaroi se nuk ishte i përkryer, por gjithmonë është munduar të bëj më të mirën për atdheun e tij dhe për qytetarët e shtetit të tij.

Mesazhi i plotë:

Motra dhe vëllezër të një gjuhe kudo që jeni, të çdo gjuhe dhe etnie këtu në Kosovë,
Miq të nderuar, ju që i shërbeni shteteve mike në Prishtinë,
Dhe, të nderuar partnerë të çmuar ndërkombëtarë,

Gjatë kësaj jave, për katër ditë rresht, kam kryer detyrimin tim qytetar dhe institucional për t’u paraqitur para prokurorëve në Dhomat e Specializuara në Hagë.

I kam përfunduar rreth 30 orë ballafaqim me trupën e organit të akuzës, ku jam njohur me të gjitha pretendimet e tyre dhe u kam dhënë përgjigje pyetjeve të tyre.

Kam respekt të plotë për procesin e zbardhjes, deri në fund, të së vërtetës dhe të rolit tim në luftën çlirimtare për liri dhe pavarësi.

Për shkaqe etike dhe të kufizimeve ligjore nuk mund të hyj në detaje konkrete të këtij ballafaqimi. Por, nga ana tjetër nuk mund të mos ndaj asgjë me ju.

Jam i vetëdijshëm që të gjithë ju që më keni qëndruar afër me përkujdesje vëllazërore, me të drejtë mund t’i keni pikëpyetjet tuaja për pretendimet e Prokurorisë Speciale ndaj meje.

Të dashur qytetarë,

Tri gjëra dua t’ju them duke kërkuar mirëkuptimin tuaj njerëzor që të mos hyj në detaje të këtyre ballafaqimeve.

E para: siç e kam thënë edhe para se ta kapërceja pragun e gjykatës, historia e lavdishme e luftës çlirimtare dhe e shtetformimit të Kosovës së pavarur, demokratike dhe evropiane nuk mund të rishkruhet nga askush!

Sot ju them me bindje se ky proces jo vetëm që nuk do ta rishkruajë këtë histori të shkruar me gjakun dhe sakrificën e një populli të tërë në luftën për liri, por përkundrazi, nga ky proces, cilado qoftë rrjedha dhe kohëzgjatja e tij, historia e lavdishme e rezistencës, mbijetesës dhe triumfit mbi një pushtues, që kërkoi të shfaroste popullin shqiptar të Kosovës nga faqja e dheut me fshesën e fashizmit etnik, do të bëhet njëherë e përgjithmonë e paprekshme nga askush!

E dyta: ky proces i radhës është në vazhdën e 21 vjetëve të akuzave, shpifjeve e fabrikimeve mbi Ushtrinë Çlirimtare të Kosovës dhe përpjekjeve të popullit të Kosovës për liri dhe shtet.

Por, ky proces do të vulosë njëherë e përgjithmonë rolin historik të UÇK-së si një rol i pazëvendësueshëm dhe i patjetërsueshëm për lirinë e fituar për të gjitha gjeneratat që do ta gëzojnë Kosovën si shtet të pavarur dhe demokratik.

Këto përbuzje etnike, maltretimi i shqiptarëve qysh në barkun e nënës, sjelljet gjenocidale kundër popullit me të drejtë historike mbi këtë tokë, represioni i kulmuar me spastrim etnik deri në përmasat gjenocidale do të jetë një prej faqeve më të errëta të së shkuarës, që kurrë më nuk do të mund të rikthehet.

Lexo edhe :  “Të kthejmë vëmendjen nga bujqësia dhe turizmi”, Meta mesazh nga Dibra: Fermerët hasin vështirësi në shitjen e produkteve

Dhe e treta: unë që pata fatin dhe nderin të kem rol në luftën dhe në rrugën e pavarësisë e të shtetformimit të Kosovës, ndjehem sot edhe më i bindur, edhe më i vendosur sesa përpara këtij ballafaqimi për vlerën e madhe që ka mundimi dhe sakrifica personale për ta çuar deri në fund zbardhjen e kësaj historie 22 vjeçare.

Një histori e mbushur me lëndime të shkaktuara nga akuzat kundër meje dhe kundër luftës sonë të përbashkët me SHBA-në, me NATO-n, me shtetet e Bashkimit Evropian dhe shtetet mike të tjera, për çlirimin e popullit të Kosovës nga diktatura fashiste e SllobodanMillosheviqit dhe e shtetit të Serbisë.

Të dashurit e mi,

Sonte dua të përsëris se për mua Kosova është gjithnjë e para.

Nëse për Kosovën isha gati të jap jetën kur isha një djalë i ri, sot që jam një prind me thinja nuk kam fare dyshim se detyra ime është ta mbroj Kosovën, duke mos lejuar që procesi ku më kanë përfshirë mua dhe bashkëluftëtarët e mi krejt padrejtësisht, të pengojë punët e mëdha që ka përpara Kosova.

Prandaj, duke ju falënderuar nga thellësia e zemrës për këtë respekt dhe solidaritet gjithëkombëtar, dua t’ju lus të gjithëve që ta vendosni Kosovën mbi dallimet politike partiake, mbi hatërmbetjet dhe pakënaqësitë e përditshme.

Kosova është një amanet që e kemi nga të parët tanë, nga rilindësit tanë, nga dëshmorët tanë, nga heronjtë tanë, nga Hasan Prishtina, Shota dhe Azemi, nga Adem Jashari, Adem Demaçi dhe Ibrahim Rugova, dhe qindra e mijëra të tjerë të cilët janë engjëjt mbrojtjes të kësaj toke.
Kosova është edhe vizion. Është edhe borxhi që ua kemi fëmijëve tanë dhe fëmijëve të fëmijëve tanë.

Atyre që po rriten në këtë vend dhe atyre që do të lindin dhe jetojnë në këtë tokë që deshën të na e mohojnë, tokë të djegur dhe të përgjakur, ku ne të gjithë së bashku kemi detyrimin të ndërtojmë rrugën e bashkëjetesës demokratike dhe multietnike.

Kështu e forcojmë demokracinë, rrisim mirëqenien dhe ndërtojmë urat e paqes së qëndrueshme mes vete dhe fqinjëve tanë.

Kosova sot ka nevojë më shumë se kurrë për dialog të civilizuar mes forcave politike, për stabilitet institucional, për qeverisje të mirë dhe unitet qytetar e politik, veçanërisht në dialogun për njohjen e saj përfundimtare nga Serbia dhe nga krejt bota.

Kosova sot duhet ta kultivojë shumëllojshmërinë e mendimit dhe të jetojë me debatin e shëndetshëm mes Qeverisë dhe opozitës.

Por, njëkohësisht duhet t’i flasim botës me një zë dhe të zhvillojmë dialogun me Serbinë me një unitet shembullor çfarë e kishim në Rambuje, në Vjenë dhe në Bruksel.

Të nderuar bashkëqytetarë,

Unë dje isha një luftëtar në shërbim të Kosovës, ndërsa ju më keni dhënë gjithçka.

Më keni besuar gjithçka që mund t’i jepet një njeriu në atdheun e tij, nga populli i tij!

Për ndërtimin e Kosovës së re, Kosovës evropiane, atdhe i të gjithë qytetarëve të saj.
Përulem me respekt për besimin tuaj!

U jam mirënjohës përgjithmonë!

Unë nuk isha i përkryer, por gjithmonë jam munduar ta bëj më të mirën për atdheun tim dhe për juve.

Dua t’ju shtrëngoj dorën secilit nga ju, t’ju përqafoj të gjithëve dhe t’ju siguroj se do të dal me çdo qelizë time të pastër si loti në fund të këtij rrugëtimi që vazhdon me ju dhe për ju.

/En.Br./Fjala.al

Të fundit

Ekskluzive/Ulet numri i fëmijëve që ndodhen në paraburgim, por 5 të mitur akuzohen për vrasje

Lajmi i publikuar sot në media se një 14-vjeçar është arrestuar në Durrës sepse në çantën e tij iu...

Vaksina ndaj Co*vid/ Manastirliu: E garantojmë sapo të jetë gati, do të mbulojmë gjithë popullatën

Ministrja e Shëndetësisë Ogerta Manastirliu u shpreh se qeveria shqiptare është gati ta blejë vaksinën ndaj koronavirusit, sapo ajo të jetë gati. E ftuar në...

Arilena Ara pjesë e ‘Milan Fashion Week’

Pandemia ka ndryshuar mënyrën se si industria e modës po i afrohet publikut me krijimet e reja. Javët e fundit, gjithçka është zhvilluar online. “Milan...

Halit Valteri: Nuk e votoj draftin, Basha u kthye në ‘doktor Co*vidi’

Deputeti i opozitës parlamentare, Halit Valteri është shprehur se ai nuk do të votojë draftin e mazhorancës për hapjen e listave. Sipas tij, edhe pse...

Nëse kjo shenjë ju del në telefon, atëherë dikush po dëgjon bisedat tuaja

Nëse jeni përdorues iPhone dhe vëreni një pikë të vogël portokalli që shfaqet në pjesën e sipërme të ekranit, kjo është një mënyrë për...

Lajme të tjera

Web TV