Është një titull simbolik, që mbart vetëm një vlerë të tillë, pasi, në mënyrë të pavarur nga njëra-tjetra, dy skuadrat e kanë arritur synimin madhor, që ishte sigurimi i vendit midis më të mirave të futbollit shqiptar sezonin e ardhshëm. Megjithatë, Apolonia është shpallur fituese e këtij edicioni të nivelit të dytë të Kampionatit Kombëtar të Futbollit, qp njihet si Kategoria e Parë, pasi mundi në finale fituesin e grupit A, apo grupit të Veriut, të kësaj veprimtarie, Kastriotin.
Fierakët, që erdhën si fitues të grupit B, apo grupit të Jugut, triumfuan me rezultatin 2-1 në finalen e luajtur të mërkurën në mbrëmje në Stadiumin “Elbasan Arena”. Skuadra e trajnerit Artan Merxhushi kurorëzon kështu në mënyrën më të mirë të mundshme sezonin 2019-2020. Në duelin final, të sjellë për sportdashësit drejtpërdrejtë dhe ekskluzivisht nga Rrjeti i Radio-Televizionit Shqiptar, në kanalin RTSH Sport, si skuadra Merxhushit, ashtu edhe ajo e homologut Ramadan Ndreu, prodhuan shumë raste.
Kur dukej se pjesa e parë do të mbyllej me rrjeta të paprekura, Ajazi rrëmben topin, driblon portierin e Apolonisë dhe realizon pa probleme me portën e boshatisur, 4 minuta para fundit të pjesës së parë. Por gëzimi i krutanëve zgjati 4 minuta. Një harkim i devijuar nga mbrojtja e Kastriotit erdhi si dhuratë për Mihanën, i cili shënoi lehtësisht me kokë. Dhe ishte Ajazi, i cili pati realizuar golin për Kastriotin, ai që ndëshkoi ekipin e tij në minutën e 67-të, duke shtyrë gabimisht topin në portën e skuadrës së tij.
Pavarësisht përpjekjeve për ta rihapur ndeshje, Kastrioti nuk ia doli të baraspeshonte takimin dhe Apolonia merr me vete në shtëpi trofeun e fitueses së kësaj veprimtarie të futbollit shqiptar.
/En.Br./Fjala.al
