Ishte caktuar si një trajner emergjence, duke marrë përsipër një detyrë që mbase nuk e kishte kërkuar e as nuk e kishte dashur, por ka vijuar të bëjë një punë të jashtëzakonshme, duke e rikthyer Tiranën tek titulli pas 11 vitesh “thatësirë” e për më tepër, duke e bërë këtë në një përvjetor historik dhe për një titull historik, atë të 25-tin. Dhe, gjatë këtij rrugëtimi 8 mujor, të trazuar nga epidemia e virusit korona, Emanuel Egno ka thyer shumë tabu, brenda, por, sidomos, jashtë fushës së blertë. Dhe trajneri i Tiranës, ka shpërthyer, duke prekur edhe një temë mjaft të nxehtë.
Duke folur për seksion afrikan të rrjetit prestigjioz sportiv televiziv ndërkombëtar, “ESPN Africa”, nigeriani ka folur mbi temën e racizmit. Edhe pse e shpalli Tiranën “kampione”, Egbo shprehet se disa herë është sulmuar prej faktit që është i huaj dhe me ngjyrë. “Unë kam liçensën e UEFA-s, por shpesh më kanë thënë: Ai është thjesht një trajner portierësh apo ai nuk ka përvojë, – ka thënë Egboja për rrjetin në fjalë. – Trajnerët vendas që drejtojnë në kampionat nuk i sulmojnë si trajnerët e huaj. Për faktin se jam i zi, sulmet janë më të shumta.”
“Të njëjtën gjë bëjnë edhe me një trajner italian, por ai është evropian dhe sulmet nuk janë aq të forta sa ndaj meje, – ka vijuar ish-portieri i përfaqësueses së Nigerisë, duke iu referuar mesa duket ish-trajnerit të Partizanit, Adolfo Sormani. – Këto janë gjëra që ta bëjnë më të vështirë punën.” Gjatë intervistës së tij, trajneri i bardhebluve nuk i ka kursyer fjalët. “Është 100-vjetori i klubit dhe një i huaj shkon e fiton titullin, – ka pohuar ai. – Kjo është e paimagjinueshme në Shqipëri. Në Shqipëri nuk mund ta pranojnë këtë. Ata provuan gjithçka që kjo të mos ndodhte.”
Por në fund Emanuel Egbo jep edhe një mendim pozitiv për shqiptarët, teksa thotë: “Në Shqipëri ka edhe njerëz të mirë, që të mbështesin, trajnerë të rinj që të dërgojnë mesazhe motivuese. Ata më motivojnë por e bëjnë fshehurazi këtë gjë pasi nuk duan të futen në telashe me drejtuesit që janë më të mëdhenj se ata. Njerëzit e mirë të ndihmojnë kurse njerëzit e këqinj më shtyjnë të arrij objektivat. Kritikat shërbejnë si inkurajim për mua”, – ka përfunduar trajneri i Tiranës, Emanues Egbo, duke folur për seksion afrikan të rrjetit prestigjioz sportiv televiziv ndërkombëtar, “ESPN Africa”.ka.ta/Fjala.al/