Pak orë pas shkarkimit të Orges Shehit, Kukësi nuk ka humbur kohë dhe ka zyrtarizuar Skënder Gegën, trajner të ri të ekipit.
Sipas njoftimit të klubit verior, palët kanë arritur akordin ditën e sotme dhe të hënën do të bëhet prezantimi i tij në sallën e konferencave në stadiumin “Air Albania”.
Gega riktheu Partizanin te titulli kampion në sezonin e shkuar 2018-2019 pas 26 vjetësh, ndërsa momentalisht ishte pa skuadër pasi pandemia e koronavirusit bëri që të shkëpuste kontratën që kishte në Jordani.
Tropojani ishte përfolur prej kohësh për një akord me ekipin e Kukësit, i cili u zyrtarizua tani në përfundim të sezonit.
“Kukësi njofton se trajneri i ri i skuadrës, do të jetë Skënder Gega, pasi palët kanë arritur ditën e sotme akordin. Prezantimi i trajnerit të ri, do të bëhet ditën e hënë në sallën e konferencave në stadiumin “Air Albania”, në orën 11:00. Klubi i uron mirëseardhjen trajnerit Gega dhe suksese me ekipin tonë!”, thuhet në njoftimin e klubit kuksian.
/En.Br./Fjala.al