Mësuesi i njohur i matematikës dhe inspektori i arsimit ka mbyllur sytë pasditen e 30 korrikut, pas një sëmundjeje të gjatë.
Për shkak të gjendjes së rënduar shëndetësore, Myderrizi ishte tërhequr vitet e fundit nga drejtimi aktiv i shoqatës, duke ia lënë në dorë Shpëtim Metanit, i ndarë nga jeta disa muaj më parë.
Për durrsakët, Halil Myderrizi do të mbetet kryetari më jetëgjatë i shoqatës “Durrësi”, e krijuar që në vitet e para të demokracisë. Ai është babai i mjekut të njohur ortoped Neritan Myderrizi.
Njoftimin për ndarjen nga jeta të Halil Myderrizit e njofton në rrjete sociale Shoqata Tirana.
Njoftimi i plotë
Shuhet Halil Myderrizi, kryetari historik i Shoqatës Durrësi! 30 korriku 2020, shënon një ngjarje të dhimbshme për Qytetarinë Durrsake dhe të Shqipërisë së Mesme!
Pas një lëngimi të gjatë në shtrat, mbylli sytë dhe ndaloi frymëmarrjen e fundit, një nga kapacitetet e urtësisë durrsake, intelektuali model, fisniku durrsak Halil Myderrizi! Humbja e këtij intelektuali të spikatur shënon dhe humbjen e njërit prej bashkëkryetarëve të Lidhjes së Shoqatave të Shqipërisë së Mesme!
Emri dhe autoriteti që Shoqata Durrësi ndërtoi në vite, lidhet ngushtë me kontributin e veçantë të kryetarit të saj historik, Halil Myderrizi!
Shoqata Durrësi me aktivitetin e saj i kaloi përmasat e qytetit të Durrësit dhe fitoi autoritet në të gjithë vendin.
Aktivitete të shumta të përbashkëta me Shoqatën Tirana dhe shoqatat e tjera si motra, Elbasani, Kavaja, Kruja, Shijaku, Pronësi me Drejtësi do të mbeten një kontribut i çmuar në rrugën e ndërtimit të demokracisë dhe të ngritjes së institucioneve të shtetit shqiptar! Si pjesë e rëndësishme e shoqërisë civile shoqatat tona kanë kontribuar në evidentimin e vlerave qytetare dhe ruajtjen e traditës dhe trashëgimisë kulturore!
Qytetarët durrsakë dhe Ne, që patëm nderin të bashkëpunojmë për të mirën e qyteteve tona, nuk do të harrojmë kurrë njeriun që me punën e tij, vlerat e tij, bënte kryelartë çdo durrsak!
U prefsh në paqe Halil Myderizi!
Lamtumire miku ynë!/Bl.Ba/Fjala.al
