Aventura e Mauricio Sarrit në krye të stolit të Juventusit ka marrë fund, pasi klubi bardhezi ka vendosur ta shkarkojë trajnerin italian. Nëpërmjet një komunikate për shtyp, skuadra e Juventusit komunikon se “Mauricio Sarri është shkarkuar nga detyra e tij si trajner i skuadrës së parë”.
Drejtuesit e ekipit torinez e kanë falënderuar trajnerin për fitoren e kampionatit italian për të 9-ën herë radhazi. Por eliminimi të premten i Juventusit nga Liga e Kampioneve që në turin e 16-shes, si dhe sjellja e italianit kundrejt drejtuesve të skuadrës kanë sjellë shkarkimin e tij.
Tanimë presidenti bardhezi, Andrea Anjeli, është vënë në kërkim të një emri të ri edhe pse lista e trajnerëve të kërkuar nga bardhezinjtë është e kufizuar. Sidoqoftë, janë 3 kandidatët kryesorë për të marrë drejtimin e stolit bardhezi, Simone Inzagi i Lacios, Zinedin Zidan i Realit te Madridit dhe Roberto Mançini, i cili drejton përfaqësuesen e Italisë.
la.mi/Fjala.al