Greqia dhe Turqia kanë pasur fërkime të shpeshta mes tyre dhe jo pak herë është krijuar frika për një luftë mes dy shteteve.
Por përplasja e fundit mbi rezervat e gazit dhe të drejtat detare ka shkaktuar frikë se tensionet mund të përshkallëzohen më tej, duke kaluar në përdorimin e armëve.
Kjo frikë ndjehet më së tepërmi tek banorët e ishujve grekë pranë Turqisë.
Shkrimtari dhe gazetari Gazmend Kapllani përmes një statusi në facebook ka shpërndarë edhe shqetësimin e një miku të tij grek, se lufta këtë herë është më pranë se kurrë.
“Kemi frikë se do të kemi luftë kësaj radhe… Nga fëmijëria ime kam jetuar me frikën e një lufte me turqit… Frika nga pushtimi… Nga fëmijëria, kam një valixhe të përgatitur në rast se ka luftë… Ka pasur të shtëna këtu natën e kaluar … Ata thanë se rojet greke hapën zjarr mbi një varkë refugjatësh që një anije luftarake turke po përpiqej të shtynte drejt brigjeve Greke … Përsëri të pafajshmit të kapur në mes kanë paguar çmimin… “, shkruan Kapllani në anglisht duek cituar mikun e tij, emrin e të cilit nuk e ka bërë publik.
Turqia dhe Greqia kanë ambicie konkurruese mbi rezervat e gazit dhe nuk pajtohen thellësisht se kush ka të drejta për zonat kryesore të Mesdheut Lindor. Ata kanë bërë pretendime për zona të mbivendosura, duke argumentuar se ato i përkasin rezervave të tyre kontinentale.
Debati ka nisur që në muajin korrik, por tashmë që anija kërkimore turke, e shoqëruar nga 5 anije ushtarake, ka mbërritur në afërsi të brigjeve grekeve tensionet janë rritur ndjeshëm.