UEFA ka konfirmuar se ndeshja Moldavi-Kosovë do të luhet në stadiumin “Enio Tardini” në Parma të Italisë. Kjo ndeshje është programuar për t’u zhvilluar më 3 shtator 2020, duke nisur nga ora 20:45. Në fakt, shumë më herët ishte vendosur që ndeshja të luhej në Parma. Por ndërkohë UEFA e hoqi Parmën si vend se ku do të zhvillohej ndeshja, duke krijuar dilema për vendin.
Kjo për arsye se Moldavia ka refuzuar që të organizojë ndeshjen në territorin e saj për faktin se nuk e njeh Kosovën. Moldavët pretendojnë që edhe ndeshja në të cilën Kosova është vendase të luhet në terren neutral. Por një mundësi të tillë e ka përjashtuar Federata e Futbollit e Kosovës. Me ndeshjen në Parma nis paraqitja e Kosovës në edicionin e dytë të Ligës së Kombeve të UEFA-s.
Ndryshe nga edicioni i parë, në të cilin garoi në Ligën D (niveli më i ultë), Kosova tani do të garojë në Ligën C, në nivelin e 3-të, aty ku është edhe Shqipëria. Kosova është në grupin e tretë së bashku me Greqinë, Slloveninë e Moldavinë. Me Greqinë, Kosova duhet të përballet më 6 shtator 2020 në Stadiumin “Fadil Vokrri” të Prishtinës. Por të gjitha ndeshjet duhet të konfirmohen pas situatës së rëndë të krijuar nga epidemia e “Covid-19”.
Moldavia ka nisur përgatitjet për ndeshjen ndaj Kosovës, ndonëse kanë mbetur edhe disa javë. Të martën, trajneri i Moldavisë, Engin Fërat, ka publikuar listën e gjerë për dy ndeshjet e shtatorit. Fërati ka ftuar gjithsej 28 lojtarë, ndërsa gjysma e tyre luajnë jashtë Moldavisë. 11 prej tyre luajnë në skuadra moldave, kurse 3 lojtarë aktualisht janë pa skuadër.
La.Mi/Fjala.al
