Përveç futbollit në vend, pra, kampionatit apo Kupës së Shqipërisë, veprimtaritë kontinentale janë mundësia më e madhe e klubeve për të përfituar sa më tepër financiarisht dhe, kur ishte në kulmin e vet, Skënderbeu dëshmoi se loja më popullore në botë nuk ishte thjesht një sport, por një minierë ari.
Kjo vlen edhe për Tiranën, e cila zbret fushën e blertë të Stadiumit “Boris Paiçadze” të Tbilisit, për t’u ndeshur me kampionen vendase, Dinamo. Në takimin që do të transmetohet në kanalin RTSH Sport, të Rrjetit të Radio-Televizionit Shqiptar, duke nisur nga ora 19:00, kampionët e Shqipërisë do të kërkojnë që të kalojnë një tur në veprimtaritë evropiane, për herë të parë pas 8 vitesh.
Është një kualifikim ky që vlen shumë edhe në aspektin financiar, pasi në arkat e kampiones së sapokurorëzuar të vendit do të shkonin edhe 380 mijë Euro të tjera, veç 280 mijë eurove për pjesëmarrjen në turin e parë të Ligës së Kampioneve.
Natyrisht, ky është njëri aspekt i përfitimit, ndërsa një tjetër aspekt është ai i ekspozimit të lojtarëve. Kupat e Evropës janë një vitrinë mjaft e mirë dhe për lojtarët këto ndeshje vlejnë shumë edhe për reklamë. Tek Tirana synojnë sigurisht edhe të shesin dhe një prej atyre lojtarëve që ka oferta, është sulmuesi Ernest Muçi. I riu do të ketë mundësinë të luajë titullar sot dhe të tregojë vlerat e tij. Në mbështetje të tij, trajneri Egbo ka programuar të zakonshmit që luajnë në Superiore.
Toli, Doka dhe Najdovski pritet të jenë 3 risitë e trajnerit Egbo në duelin e Ligës së Kampioneve ne Dinamo e Tbilisit. Në fakt, një hapësirë që duhet mbushur është ajo e Albi Dokës në krahun e djathtë të mbrojtjes, me futbollistin të larguar drejt Kroacisë, atje ku ka shkëlqyer në që në nisje. Vendin e tij duket se do ta marrë Ardit Toli, ndërsa një tjetër lëvizje e rëndësishme është futja e menjëhershme e Filip Najdosvkit në qendër të mbrojtjes bardheblu.
Maqedonasi përcolli qetësi, për aq kohë sa luajti në miqësoren me Pogradecin, ashtu sikundër ka bindur edhe këto ditë gjatë stërvitjes. Një tjetër konfirmim është ai në majën e sulmit i talentit Ernest Muçi, i cili ishte autori i dy golave në fitoren 3-0 në miqësoren e mesjavës së shkuar dhe duket se do të jetë që nga minuta e parë ndaj gjeorgjianëve. Ai e ka fituar balotazhin me Albion Avdijajn, i cili gjithashtu shënoi në atë miqësore dhe nuk përjashtohet mundësia të aktivizohet më vonë.
Për sa i përket pjesës tjetër të lojtarëve të formacionit, luajnë në mbrojtje Vangjeli e Hoxhallari, në mesfushë Batha e Çelhaka. Pak më parë Torasa, ndërsa nga krahët Kale e Kobina plotësojnë shpejtësinë e ekipit. Shqetësimi i vetëm për Tiranën është Hoxhallari. Lojtari ka pasur një shqetësim të vogël gjatë fazës përgatitore, por pritet të jetë i gatshëm për fushën e lojës. Nëse ai nuk ia del, atëherë titullar do të jetë Ismajlgeci./Bl.Ba/Fjala.al
