Deputeti i Partisë Socialiste, Eljo Hysko në një intervistë për Fax News ka rrëfyer eksperiencën e tij me koronavirusin Covid-19. Hysko është shprehur se gjithçka që e bëri të dyshoj se ishte infektuar me Covid-19 ishte dhimbja e fortë e kokës e cila në vijim u shoqërua me simptomat e tjera si humbja e shqisës së nuhatjes dhe shijes.
Ai shprehet se ka qëndruar për 17 ditë i karantinuar dhe i vetëm për të mos infektuar asnjë njeri tjetër. Ndërsa thekson se është e rëndësishme të zbatohen rregullat bazë si respektimi I distancës fizike si dhe mbajtja e higjenës personale.
“Kur është bërë publik lajmi, kisha 12 ditë i karantinuar. Gjej rastin të falenderoj mjekët që u kujdesën për shëndetin tim. Në radhë të parë qytetarët të mundohen të ruajnë qetësinë. Kisha dhimbje koke ditët e para, më e fortë se zakonisht dhe aty dyshova se isha infektuar. Brenda ditës mu krye tamponi, pastaj pata një agravim të dhimbjeve si dhe humbje të shijes së nuhatjes. Simptomat ishin të ndryshme. Nuk pata probleme fatmirësisht në rrugët e frymëmarrjes.
Fatmirësisht nuk ka pasur asnjë familjar të infektuar. Ime më nuk ishte infektuar dhe ky ishte një çlirim i madh për mua. Duhet të bëjmë kujdes edhe më shumë, pasi virusi është shumë serioz dhe mbi të gjitha është i rrezikshëm për njerëzit tanë të afërm. Komunikimi me mjekët ka qenë i vazhdueshëm dhe më ndihmuan edhe psikologjikisht. Kam qëndruar 17 ditë i karantinuar i vetëm, pasi nuk doja që të infektoja njeri. Kërkohen gjëra bazike të thjeshta, mbajtja e distancës, mbajtja e higjienës personale dhe dezinfektimi i duarve,”– tha Hysko./Re.Gu/Fjala.al
