Presidenti i vendit, Ilir Meta, ka vlerësuar me Titullin e lartë “Kalorës i Urdhrit të Flamurit” arbëreshin Giovanni Valenza, me mirënjohje për besnikërinë ndaj gjakut të të parëve, bindjeve dhe parimeve të tij të larta morale, si shembull i patriotizmit, trimërisë dhe vetëmohimit për vlerat universale e të gjithëkohëshme njerëzore.
Sipas Metës, Valenza është përjetësuar në kujtesën e kombit shqiptar si një nga figurat e rëndësishme dhe unike në epopenë e lavdishme të Luftës së Vlorës dhe ka hyrë në historinë e Shqipërisë me aktin e pashembullt dhe heroik të braktisjes vullnetarisht të radhëve të ushtrisë pushtuese, për t’u bashkuar me kryengritësit shqiptarë rreth vlerave të Lirisë dhe Atdhedashurisë.
Mesazhi i Metës:
Arbëreshi Giovanni Valenza është përjetësuar në kujtesën e kombit shqiptar si një nga figurat e rëndësishme dhe unike në epopenë e lavdishme të Luftës së Vlorës. Ai hyri në historinë e Shqipërisë me aktin e pashembullt dhe heroik të braktisjes vullnetarisht të radhëve të ushtrisë pushtuese, për t’u bashkuar me kryengritësit shqiptarë rreth vlerave të Lirisë dhe Atdhedashurisë, në luftën ndaj së keqes.
Për kontributin e Tij të çmuar në Luftën e Vlorës, pata sot nderin ta vlerësoja me Titullin e lartë “Kalorës i Urdhrit të Flamurit”, me mirënjohje për besnikërinë ndaj gjakut të të parëve, bindjeve dhe parimeve të tij të larta morale, si shembull i patriotizmit, trimërisë dhe vetëmohimit për vlerat universale e të gjithëkohëshme njerëzore.
Po sot pata kënaqësinë të vlerësoja edhe dy figura të nderuara të Luftës së Vlorës, Dr.Ali Mihalin, mjekun e lindur në Prishtinën e dashur, i cili gjithë jetën e tij ia kushtoi çështjes shqiptare, duke u përfshirë në lëvizjen kombëtare në Vlorë si mjek i kryengritjeve, si edhe intelektualin e komandantin e një prej çetave më të spikatura në kësaj Lufte, Ali Spahiun, të lindur në Malind të Skraparit, vendlindjen e poetit tonë të madh Xhevair Spahiu.
Bashkimi i lebërve, toskëve, gegëve e të gjithë shqiptarëve në mbrojtjen e interesave kombëtare, integritetit territorial, Pavarësisë e Sovranitetit të Shqipërisë, të na udhëheqë për të kapërcyer çdo sfidë në rrugëtimin tonë si qytetarë të lirë drejt familjes europiane.??
https://www.facebook.com/ilirmetazyrtar/posts/3309255195787397
Ka.Li/fjala.al
