Nga Lira Gjika
Fëmijët, që do të fillojnë klasën e parë, sot kanë blerë tufat e luleve që do tu dërgojnë mësueseve të tyre. Kjo është një traditë që tashmë i ka kaluar të gjashtëdhjetë vjetët, por unë do tu lutesha mësueseve që edhe ato të përpiqen të bëjnë diçka të tillë me nxënësit.
Mund tu dhurojnë një laps me ngjyra apo një gomë fshirëse, pra gjëra të vogla që e bëjnë fëmijën të ndihet mirë dhe i sigurt, pasi edhe mësuesja ka menduar për të. Kjo ide më lindi nga tregimi i një mikes time, që jeton në Gjermani, në një qytet të vogël, që quhet Mittweida.
Djali i saj, kur kishte filluar shkollën nuk kishte dërguar lule zyshës, por zysha i kishte dhuruar çdo fëmije të klasës, diçka simbolike. Mu duk një veprim shumë domethënës dhe qytetar, që mësuesit aplikonin në pritjen e fëmijëve.
Ky tregim u bë shkak të mendoja, që ne mund ta pasurojmë traditën tonë, që ashtu si fëmijët i dhurojnë lule mësueses edhe ajo tu dhuron diçka të vogël e të vlefshme për mësimin.
Ky veprim i mësueses është shumë i rëndësishëm për nxënësin, i cili ka nevojë të jetë i njohur dhe i mirëpritur nga mësuesja e tij. I uroj gjithë nxënësve dhe mësuesve vit të mbarë mësimor edhe pse kohët janë shumë të vështira. Me disa veprime të vogla ky vit shkollor mund të realizohet me sukses.
