Policia e Tiranës del me deklaratë lidhur me rastin e shantazhit ndaj një vajze të re në Tiranë, të cilës i kërkoheshin para, për të mos iu publikuar disa fotografi intime.
Nga Sektori për Hetimin e Krimeve të Rënda ndaj Jetës dhe Pronës u bë arrestimi në flagrancë i Afrim Kurtit, 18 vjeç, si dhe u referuan materialet në Prokurorinë e Tiranës, për të shpallurin në kërkim Dëfrim Kurti, 30 vjeç, ish i dashuri i së resë.
Dy kushërinjtë akuzohen se në bashkëpunim me njeri tjetrin kanë shtrënguar me anë të kanosjes dhe dhunës për dhënie pasurie, një shtetase, me qëllim t’i përvetësonin shumën prej 15.000 lekësh të reja, për mospublikimin e fotove të saja në rrjetet sociale.
Por në vendin ku e dëmtuara supozohej se duhet të dorëzonte paratë, policia prangosi Afrim Kurtin, ndërsa i dyshuari kryesor u shpall në kërkim.
Kujtojmë se Dëfrim Kurti u arrestua edhe në vitin 2019, i dyshuar si i përfshirë në vrasjen e shoferit të furgonit të pasagjerëve, Arben Gjeci, me të cilin kishte lidhje jashtëmartesore bashkëshortja e tij Elida Cani.
Dëfrim Kurti u la i lirë, pasi u zbulua se Gjecin e kishte vrarë vëllai i Elidës, Esat Cani./Bl.Ba/Fjala.al