Ditën e sotme është duke u zhvilluar një takim mes një grupi mjekëve të QSUT-së me përfaqësues të qeverisë dhe të Ministrisë së Shëndetësisë në ambientet e Kryeministrisë.
Përfaqësuesit e bluzave të bardha janë: Gentian Stroni, Altin Kuqo, Fatos Olldashi, Arjan Harxhi dhe Arjan Mezini. Burimet për mediat bëjnë me dije se pjesë e takimit do të jetë dhe kryeministri Edi Rama së bashku me ministren e Shëndetësisë, Ogerta Manastriliu.
Kujtojmë se ky takimi po zhvillohet pas paralajmërimit të protestës së bluzave të bardha. Sipas mjekëve atyre u është refuzuar kërkesa për protestë nga policia pasi në kushtet e pandemisë kjo përbën një shkelje ligjore.
Ndërkohë në takimin e sotëm katër kërkesat e parashtruara nga mjekët janë:
-Të shpallen dëshmorë të kombit të gjithë ata pjesëtarë të personelit shëndetësor të cilët humbin jetën në këtë luftë me këtë armik të padukshëm
-Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën edhe pas fatkeqësive të mundshme në këtë luftë.
-Rritje të vlerësueshme e trajtimit financiar të personelit shëndetësor.
-Personeli shëndetësor të çdo niveli t’i sigurohen të gjitha kushtet optimale në punë për parandalimin e infeksionit sipas të gjitha standardeve kombëtare dhe ndërkombëtare.
