Kryeministri shqiptar Edi Rama ka deklaruar publikisht se ai jo vetëm që nuk di t’i japë makinës, por nuk disponon as patentë. Ndërkohë që për gjyshin e tij, duket se përveç se një shofer i zoti, është zbuluar se ka qenë edhe fitues i njërës prej garave të para me automjete të mbajtura në vendin tonë.
Kjo vërtetohet përmes një dokumenti të zbuluar nga Drejtoria e Përgjithshme e Arkivave, ku citohet se Vlash Rama ka fituar garën me makina me të cilën ka zënë vendin e parë, e mbajtur në vitin 1931.
“Kategoria e Madhe 1500 e lartë fitues Vlash Rama prej Durrësi, veturë marka R30 dhjetë km. 26 me 21 minuta”, thuhet ndër të tjera në dokument.
Drejtoria e Përgjithshme e Arkikave e shoqëron dokumentin e rrallë edhe me mbishkrimin: “A e dini se në Shqipëri vite më parë janë zhvilluar gara automobilistike? Ishte 24 shtatori i vitit 1929, kur u zhvillua gara e parë. Me këtë rast po sjellim dokumente interesante mbi zhvillimin e edicionit të dytë, të vitit 1931, të këtyre garave, ku përmenden emrat e garuesve, vendi se ku zhvillohej edhe lloji i automjeteve që garonin”. /Ra.My.Fjala.al/