Drejtoria e Teatrove Shtetërore të Turqisë (DT) do të marrë pjesë në Festivalin e Teatrit Bashkëkohor “Skampa 2020” që po mbahet në Elbasan, me shfaqjen e veprës vendore teatrale “Libraria e Pafundësisë” (Sonsuzluk Kitabevi).
Sipas deklaratës së bërë nga DT, Teatri Shtetëror i Ankarasë do të realizojë shfaqjen në Festivalin e 22-të Ndërkombëtar të Teatrit Bashkëkohor Skampa, i cili po mbahet në qytetin e Elbasanit në Shqipëri.
Trupa e Teatrove Shtetërore nga Turqia po qëndron në Elbasan nga 30 shtatori deri më 4 tetor pas ftesës që morën. Shfaqja “Libraria e Pafundësisë”, një vepër lokale, do të realizohet me titra shqip.
E shkruar nga Sabahattin Kudret Aksal dhe me regji nga Drejtori i Përgjithshëm i DT-së, Mustafa Kurt, “Libraria e Pafundësisë” do të shfaqet për artdashësit të shtunën, 3 tetor, në ora 19:00 në Kalanë e Elbasanit.
Duke u takuar përsëri me entuziastët e teatrit pas 40 vitesh në skenat e DT-së, “Libraria e Pafundësisë” tregon historinë e një njeriu që dëshiron t’u dërgojë veprat e shkrimtarëve që kanë shkruar vepra të pavdekshme të gjithë të njohurve të tij, gruas së tij, miqve dhe njerëzve, duke synuar të bëhet i pavdekshëm me vepra të pavdekshme.
Në rolet kryesore në shfaqje do të paraqiten Özgür Deniz Kaya, Orida Yıldıran dhe Gizem Yönel.
Festivali Ndërkombëtar i Teatrit Bashkëkohor “Skampa” është një nga aktivitetet më të mëdha teatrale në Shqipëri që organizohet në vjeshtë tashmë 21 vjet në qytetin me trashëgimi kulturore, Elbasan.
Në festivalin që ka filluar më 29 shtator dhe do të vazhdojë deri më 4 tetor marrin pjesë 10 trupa teatrale shqiptare dhe të huaja, përfshirë edhe nga Kosova, Maqedonia e Veriut dhe Mali i Zi./AA/
La.Mi.Fjala.al
