Rusia tha se do të dëbojë dy diplomatë bullgarë, gati tri javë pasi dy pjesëtarë të stafit të Ambasadës ruse në Sofje, janë akuzuar për spiunim. Atyre iu është thënë të largohen.
Autoritetet bullgare i kanë shpallur dy diplomatët rusë “persona të padëshirueshëm” më 23 shtator, nën akuzat se kanë mbledhur informacione sekrete shtetërore për planet e Bullgarisë për modernizmin ushtarak.
Duke e përshkruar veprimin e Bullgarisë si të pabazë, Ministria e Jashtme e Rusisë tha se e ka thirrur ambasadorin bullgar në Moskë, Atanas Krystin, për ta informuar se dy diplomatët, me seli në Moskë, janë shpallur “persona të padëshirueshëm”.
Procedimi penal kundër tyre nuk ka mundur të vazhdojë, pasi ata kishin imunitet diplomatik.Ambasada ruse në Sofje ka thënë se nuk ka prova për të justifikuar “dëbimin e paarsyeshëm” të diplomatëve të saj.
Bullgaria është anëtare e NATO-s dhe e Bashkimit Evropian, me lidhje përgjithësisht të mira me Rusinë, e cila e furnizon atë me energji.
Sofja, edhe në janar, ka dëbuar dy diplomatë rusë, nën dyshimet se kanë ndjekur informacione të klasifikuara. Ru. Do/ Fjala.al