Kryetarja e Lëvizjes Socialiste për Integrim, Monika Kryemadhi ka zbuluar dy qarqet në të cilat mund të kandidojë për deputete.
E ftuar mbrëmjen e sotme në emisionin ‘Aktualitet’, Kryemadhi përmendi qarkun e Elbasanit dhe atë të Fierit, si dy opsionet për të kandiduar për deputete.
“Është shpejt për të folur për listën e deputeteve të LSI-së. Po bëjmë zgjedhjen e delegatëve për Konventën e partisë me datën 5 dhjetor. Nuk e kam problem fare. Akoma nuk e kam vendosur ku do të kandidoj për deputete, por kam dy ide Elbasan dhe Fier.”, theksoi ajo.
Ndër të tjera, Kryemadhi shtoi se ajo nuk i trembet askujt dhe përballet me këdo që i del para.
“Monika Kryemadhi përballet me këdo që i del para. Nuk ka të bëjë me interesin tim personal, por ka të bëjë me parimet. Meqë me Kodin e ri e kanë vendosur kryetarin e partisë të kandidojë në katër qarqe do të shikojmë.” tha ajo.
Kujtojmë se më herët u përfol që Kryemadhi mund të kandidonte në qarkun e Durrësit, pasi në këtë qark u aludua gjithashtu se mund të kandidonte edhe kryeminstri Rama. Më pas ishte ky i fundit, që mohoi gjithçka duke konfirmuar se do të kandidonte sërish në Vlorë.
Pa.Va/Fjala.al