Presidenti i Francës Emmanuel Macron ka konfirmuar mbështetjen e tij për Greqinë në konfliktin e saj me Turqinë.
Macron u shpreh se qëllimi kryesor i tij është që palët të afrohen drejt një dialog. Gjithashtu, ai shtoi se BE vazhdon të kërkojë një armëpushim sa më shpejt të jetë e mundur në konfliktet midis Armenisë dhe Azerbajxhanit.
“Ne u kthyem në çështjen e Turqisë pas konkluzioneve të 2 tetorit dhe posaçërisht pas rifillimit të veprimeve të njëanshme dhe provokimeve nga ana e Turqisë, në mënyrë që të riafirmojmë shumë qartë qëllimin tonë për dialog.
Por konkluzioni ynë është se pas përfundimeve të 2 tetorit, Turqia vendosi të vazhdojë me të njëjtat metoda dhe, prandaj rikonfirmoj mbështetjen tonë për Qipron dhe Greqinë, dhe synimet tona për të mos u lëkundur përballë këtyre provokimeve. Ne do t’i kthehemi kësaj çështje me vendime në muajt e ardhshëm, në varësi të zhvillimeve të sjelljes së Turqisë”, u shpreh Macron.
Kjo nuk është hera e parë që Franca mbështet hapur Greqinë në konfliktin e saj me Turqinë. Macron e ka shprehur edhe më herët suportin për shtetin helen, gjë që ka acaruar jo pak Presidentin Erdogan.
Jo më larg se para dy ditësh, ushtria greke u alarmua pasi anija turke “Oruç Reis”, rifilloi kërkimet në jug të ishullit Kastelorizo.