Zv. kryeministri Erion Braçe ka sulmuar opozitën duke përfshirë këtu edhe presidentin Ilir Meta.
Ai ka zgjedhur që t’i identifikojë vetëm me shkronjat e para të mbiemrave, M-B-K, Metën, Bashën dhe Kryemadhin. Ai është ndalur në tre episode kryesore të regjistruara nga këto 3 figura politike, sipas së cilit Shqipëria e udhëhequr nga këto nuk bëhet.
“M-B-K cfare shpifësire! Shqipëria e këtyre! Po po, Shqipëria e këtyre! Tre udhëheqes në një ditë, kthim i rënde pas! I pari, i theu në mes gazetarët. Sot nuk guxoi kërkush t’i kërkonte llogari për firmat, vulat dhe dekretet e tij! Pas lincimit publik të një gazetari prej vërteti, familjes së tij, sot “omerta” kërciti në sallën më të pushtetshme të vendit. Kjo mund të jetë Shqipëria e tij; E njëjtë me atë të Mafia-s ku ai që thotë të vërtetën sulmohet, delegjitimohet, vritet!
I dyti, ju tha gazetarëve se ç’duhet të bëjnë, si duhet të bëjnë kronikat, madje madje si duhet ta kenë politikën editoriale, të lidhur me gënjeshtrat e tij, përhapjen e tyre.
Është tamam ai që ka ngritur një qendër të shtrenjtë propagande ku bën filma, por kurrë lajme të vërteta. Kjo mund të jetë Shqipëria e tij; E njëjtë me atë të qëmotit ku zyra e propagandës sundon lajmin e lirë, e mbyt, e vret, e varros!
I treti, vendosi të përjashtoje transmetuesin publik të lajmit etj, nga transmetimi i lajmeve mbi futbollin, golat e vërtetë apo të rremë, të paravendosur të një futbolli të dënuar si të korruptuar! Ky është edhe më i fortë se dy të parët; Ky ka pezulluar e po vdes futbollin! Ka bërë edhe më shumë; Ky dikton, ja arrin por edhe dështon, të vrasë të vërtetën në studiot e sportit! Kur dështon, bën këtë që bëri sot; Ndëshkon këdo që flet për futbollin e pistë e të korruptuar, i përzë! Kjo mund të jete edhe Shqipëria e këtij. E kuptoni çfarë shpifësire është Shqipëria e këtyre?!”, shkruan Braçe.
Javët e fundit përplasjet më të mëdha në politikën shqiptare kanë qenë mes kryeministrit Edi Rama dhe presidentit Ilir Meta. Në distancë ata kanë shkëmbyer replika dhe akuza të rënda ndaj njëri-tjetrit, duke lënë në hije kryetarin e opozitës Lulzim Basha. Jo më kot, edhe Braçe ka zgjedhur ta etiketojë Presidentin si pjesë e opozitës.
Pa.Va/Fjala.al