Ministri i Jashtëm grek, Nikos Dendias ka zhvilluar një takim edhe me kryetarin e Partisë Demokratike, Lulzim Basha, me këtë të fundit që u shpreh se çështja e detit duhet të zgjdhet përmes Gjykatës Ndërkombëtare.
Kreu demokrat thotë se është domosdoshmëri që pala greke të anulojë ligjin e luftës me Shqipërinë. Basha e falënderoi ministrin grek për mbështetjen që Greqia po i jep Shqipërisë në procesin e integrimit europian.
“Sot pata kënaqësinë të takohem me ministrin e jashtëm të Greqisë Nikos Dendias. Gjatë bisedës, nënvizuam domosdoshmërinë që në frymën e mirëkuptimit dhe respektit reciprok, të zgjidhim çështjet e mbetura pezull dhe të intensifikojmë bashkëpunimin dypalësh në të gjitha fushat, përfshirë edhe lehtësitë për shqiptarët që jetojnë e punojnë në Greqi.
Ritheksova qëndrimin e shprehur prej 10 vitesh, se zgjidhja për çështjen e detit duhet të vijë përmes Gjykatës Ndërkombëtare dhe i përsërita ministrit Dendias domosdoshmërinë për abrogimin e ligjit të luftës. Në emër të Partisë Demokratike dhe opozitës shqiptare e falënderova atë për mbështetjen e çmuar që Greqia po i jep vendit tonë në procesin historik të integrimit evropian.”, shkruan Basha.
Më herët, ministri Dendias zhvilloi takime edhe me kryeministrin Edi Rama e Presidentin Ilir Meta.
Pa.Va/Fjala.al